Staðan á Íslandi

Að meðaltali greindust 16 tilfelli inflúensu síðastliðnar 4 vikur.

Í viku 13 var fjöldi greindra tilfella RS-veirusýkingu (RSV) 14 og í viku 14 var fjöldi greindra tilfella sjö og lágu tvö börn undir eins árs inni á Landspítala með RSV í síðustu viku. RSV bólusetningum hefur nú verið hætt þetta tímabil.

Mælaborð sóttvarnalæknis um öndunarfærasýkingar hefur verið uppfært með gögnum fyrir vikur 13 og 14 (23. mars−5. apríl 2026). Fjöldi greininga byggir á rannsóknarniðurstöðum en flest sýni koma frá spítölum en færri frá heilsugæslunni.

Inflúensa

Inflúensan var fyrr á ferðinni en undanfarna vetur. Toppi var náð í fyrstu viku desembermánaðar 2025 en hversu lengi faraldur heldur áfram er enn óljóst. Sjá mynd 1 og mælaborð.

Mynd 1: Fjöldi greininga inflúensu síðustu vikur (rauð lína) samanborið við undanfarna vetur eftir vikum ársins, sjá mælaborð sóttvarnalæknis.

Í viku 13 greindust 11 tilfelli inflúensu, allt af tegund A, átta af undirtegundinni A(pdm09) og þrjú af A(H3). Einstaklingar sem greindust voru í eftirfarandi aldurshópum: Átta einstaklingar 65 ára og eldri, tveir 15−64 ára og eitt barn undir 5 ára.

Í viku 14 greindist 21 tilfelli inflúensu, allt af tegund A og af undirtegundinni A(pdm09). Hluti þessa fjölda tilfella og inniliggjandi skýrist af hópsýkingum af völdum inflúensuveiru á tveimur deildum Landspítala í viku 14.

Í viku 13 voru fjórir einstaklingar inniliggjandi á Landspítala með inflúensu, allir 65 ára og eldri. Í viku 14 voru 15 einstaklingar inniliggjandi á Landspítala með inflúensu, 12 voru 65 ára og eldri og þrír 15−64 ára. Sjá mynd 2.

Tveir meginstofnar inflúensu sem geta sýkt fólk eru af tegund A (sem veldur árlegum faröldrum) og B (sem veldur reglulegum faröldum, aðallega í börnum). Aðeins fjögur tilfelli af tegund B hafa greinst hér á þessu tímabili það sem af er vetri.

Mynd 2: Fjöldi og aldur einstaklinga með inflúensu innlagðir á Landspítala frá viku 42 árið 2025 til viku 14 árið 2026.

Veirulyf gegn inflúensu (Tamiflu) má nota fyrir einstaklinga sem eru í meiri hættu á alvarlegum veikindum. Lyfinu er ávísað af lækni og þarf að gefa snemma í veikindum og jafnvel áður en rannsóknarniðurstaða fæst.

Nánari upplýsingar um inflúensu má finna á vef embættis landlæknis.

RS-veirusýkingar

Að meðaltali hafa greinst 13 tilfelli RSV á viku síðustu fjórar vikur. Í viku 13 greindust 14 tilfelli RSV, fimm einstaklingar 65 ára og eldri, tveir 15−64 ára, tvö börn 3−4 ára, þrjú börn 1−2 ára og tvö börn undir 1 árs.

Í viku 14 greindust sjö tilfelli RSV, tveir einstaklingar 65 ára og eldri, tveir 15−64 ára, tvö börn 1−2 ára og eitt barn undir 1 árs. Sjá mynd 3.

Þrír einstaklingar lágu inni á Landspítala með RSV í viku 13, tveir 65 ára og eldri og eitt barn 3−4 ára. Tveir einstaklingar lágu inni í viku 14, tvö börn undir 1 árs.

Mynd 3: Fjöldi greininga og aldur einstaklinga með RSV á viku frá viku 48 árið 2025 til viku 14 árið 2026 (sjá einnig mælaborð sóttvarnalæknis).

Nú í vetur bauðst börnum sem voru fædd 1. maí 2025 eða síðar mótefni gegn RSV (nirsevimab) auk barna 6−23 mánaða sem Barnaspítali Hringsins hefði að öðrum kosti boðið palivizumab. Þáttaka í RSV bólusetningum í vetur hefur verið mjög góð. Bólusetningum gegn RSV fyrir nýfædd börn hefur nú verið hætt þetta tímabil.

Sjá nánar frétt á vef embættis landlæknis.

Nánari upplýsingar um RS-veirusýkingar og bólusetningar gegn RSV má finna á vef embættis landlæknis.

COVID-19

Fjöldi tilfella COVID-19 hefur haldist nokkuð stöðugur í vetur. Í viku 13 greindust fimm einstaklingar, einn 65 ára og eldri, einn 15−64 ára og þrír 0−4 ára. Í viku 14 greindust sex einstaklingar, þrír 15−64 ára, tveir 5−14 ára og einn 0−4 ára. Síðustu fjórar vikur greindust að meðaltali 5 tilfelli COVID-19 á viku.

Tveir einstaklingar voru inniliggjandi á Landspítala með COVID-19 í viku 13, einn í aldurshópnum 65 ára og eldri og einn 1−2 ára. Í viku 14 var einn einstaklingur inniliggjandi með COVID-19, barn undir 1 árs.

Aðrar öndunarfærasýkingar

Af öðrum öndunarfæraveirum en að ofan, greinist um þessar mundir mest af rhinoveiru,human metapneumoveiru og kórónuveirum öðrum en SARS-CoV-2 á Sýkla- og veirufræðideild Landspítala. Í viku 13 greindust níu með human metapneumoveiru og 17 með kórónuveiru aðra en SARS-CoV-2. Í viku 14 greindust 15 með rhinoveiru,13 með human metapneumoveiru og 10 með kórónuveiru aðra en SARS-CoV-2.

Staðan í Evrópu

• Í flestum ríkjum ESB/EES hefur fjöldi fólks sem leitar til heilsugæslu með einkenni öndunarfærasjúkdóma verið í lágmarki, sem bendir til lítillar útbreiðslu öndunarfærasýkinga.

• Útbreiðsla inflúensu og sjúkrahúsinnlögnum fer minnkandi í öllum aldurshópum. Undirtegundirnar A(H3) og A(H1)pdm09 eru ríkjandi.

• Útbreiðsla RSV og fjöldi innlagna er enn mikill, og börn undir fimm ára aldri eru áfram stærsti hópur þeirra sem leggjast inn.

• Útbreiðsla COVID-19 (SARS-CoV2) er áfram lítil í öllum aldurshópum og fjöldi sjúkrahúsinnlagna er lítill.

Sjá frekari upplýsingar á vef Sóttvarnastofnunar Evrópu.

Sóttvarnalæknir minnir fólk á að:

• Vera heima á meðan þú hefur einkenni og þangað til vel á batavegi og hitalaus í sólarhring.

• Sýna sérstaka varúð í nánd við viðkvæma einstaklinga ef þú ert með einkenni sýkingar.

• Lágmarka umgengni við aðra sem eru með einkenni sýkingar.

• Hylja munn og nef við hósta og hnerra.

• Þvo hendur oft og vel.

• Þrífa sameiginlega snertifleti og lofta út í sameiginlegum rýmum eins og hægt er.

• Íhuga notkun andlitsgrímu eftir aðstæðum.

Að öllu óbreyttu koma næstu Öndunarfærafréttir út eftir tvær vikur.

Sóttvarnalæknir