Staðan á Íslandi

Að meðaltali greindust 13 tilfelli inflúensu síðastliðnar 4 vikur. Í viku 8 var fjöldi greindra tilfella RS-veirusýkingu (RSV) 15 og lágu átta einstaklingar inni á Landspítala með RSV.

Mælaborð sóttvarnalæknis um öndunarfærasýkingar hefur verið uppfært með gögnum fyrir viku 8 (16.−22. febrúar 2026). Fjöldi greininga byggir á rannsóknarniðurstöðum en flest sýni koma frá spítölum en færri frá heilsugæslunni.

Inflúensa

Inflúensan var fyrr á ferðinni en undanfarna vetur. Toppi virðist hafa verið náð í fyrstu viku desembermánaðar 2025 en hversu lengi faraldur heldur áfram er enn óljóst. Sjá mynd 1 og mælaborð.

Mynd 1: Fjöldi greininga inflúensu síðustu vikur (rauð lína) samanborið við undanfarna vetur eftir vikum ársins, sjá mælaborð sóttvarnalæknis.

Í viku 8 greindust 14 tilfelli inflúensu, allt tilfelli af tegund A, þar af fjögur af tegund A(H3) og tíu af tegund A(pdm09). Einstaklingar sem greindust voru í eftirfarandi aldurshópum: 11 einstaklingar 65 ára og eldri og þrír 15−64 ára. Fimm einstaklingar voru inniliggjandi á Landspítala með inflúensu, fjórir 65 ára og eldri og einn 15−64 ára. Sjá mynd 2.

Mynd 2: Fjöldi og aldur einstaklinga með inflúensu innlagðir á Landspítala frá viku 42 árið 2025 til viku 8 árið 2026.

Tveir meginstofnar inflúensu sem geta sýkt fólk eru af tegund A (sem veldur árlegum faröldrum) og B (sem veldur reglulegum faröldum, aðallega í börnum). Engin tilfelli af tegund B hafa greinst hér síðastliðnar 5 vikur en ekki er útilokað að geti greinst á næstu vikum.

Veirulyf gegn inflúensu (Tamiflu) má nota fyrir einstaklinga sem eru í meiri hættu á alvarlegum veikindum. Lyfinu er ávísað af lækni og þarf að gefa snemma í veikindum og jafnvel áður en rannsóknarniðurstaða fæst.

Nánari upplýsingar um inflúensu má finna á vef embættis landlæknis.

RS-veirusýkingar

Í viku 8 greindust 15 tilfelli RS-veirusýkingar (RSV), sex einstaklingar 65 ára og eldri, einn 15−64 ára, einn 5−14 ára, fjögur börn 1−2 ára og þrjú börn undir 1 árs, sjá mynd 3. Átta einstaklingar lágu inni á Landspítala með RS−veiru, fimm 65 ára og eldri, tvö börn 1−2 ára og eitt barn undir 1 árs. Að meðaltali hafa greindst 22 tilfelli RSV á viku síðustu fjórar vikur.

Nú í vetur býðst börnum sem eru fædd 1. maí 2025 eða síðar mótefni gegn RSV (nirsevimab) auk barna 6−23 mánaða sem Barnaspítali Hringsins hefði að öðrum kosti boðið palivizumab yfir RSV tímabilið um það bil fram til 31. mars 2026.

Nánari upplýsingar um RS-veirusýkingar og bólusetningar gegn RSV má finna á vef embættis landlæknis.

Mynd 3: Fjöldi greininga og aldur einstaklinga með RSV á viku frá viku 48 árið 2025 til viku 8 árið 2026 (sjá einnig mælaborð sóttvarnalæknis).

COVID-19

Fjöldi tilfella COVID-19 hefur haldist nokkuð stöðugur í vetur en í viku 8 greindust níu einstaklingar, fimm 65 ára og eldri, tveir 15−64 ára, einn 5−14 ára og einn 0−4 ára. Síðustu fjórar vikur greindust að meðaltali 10 tilfelli COVID-19 á viku. Einn einstaklingur var inniliggjandi á Landspítala með COVID-19, í aldurshópnum 65 ára og eldri.

Aðrar öndunarfærasýkingar

Af öðrum öndunarfæraveirum en að ofan, greinist mest um þessar mundir mest af human metapneumoveiru og kórónuveirum, öðrum en SARS-COV-2, á Sýkla- og veirufræðideild Landspítala. Undanfarinn mánuð hefur vikulegur fjöldi rhinoveirugreininga (kvefi) verið á bilinu 10–30 en í viku 8 greindust 9 með rhinoveiru, 13 með human metapneumoveiru og 24 með kórónuveiru aðra en SARS-CoV-2.

Staðan í Evrópu

• Í flestum ríkjum ESB/EES er fjöldi fólks sem leitar til heilsugæslu með einkenni öndunarfærasjúkdóma enn hár, sem bendir til að enn sé veruleg útbreiðsla öndunarfærasýkinga.

• Útbreiðsla inflúensu er áfram víðtæk en hefur almennt farið minnkandi undanfarnar vikur. Á heildina litið hefur sjúkrahúsinnlögnum fækkað frá áramótum, en einstaklingar 65 ára og eldri hafa verið stærsti hluti innlagna á tímabilinu. Inflúensa A(H3) er enn ríkjandi undirtegundin, en þar á eftir kemur A(H1)pdm09. Lítið útbreiðsla hefur verið af tegund B.

• Útbreiðsla RSV er áfram aukin, þó hún sé mismikil eftir löndum. Börn undir fimm ára aldri eru stærsti hluti þeirra sem leggjast inn á sjúkrahús af völdum RSV.

• Útbreiðsla COVID-19 (SARS-CoV-2) er áfram lítil í öllum aldurshópum og sjúkrahúsinnlagnir eru fáar miðað við inflúensu og RSV.

Sjá frekari upplýsingar á vef Sóttvarnastofnunar Evrópu.

Sóttvarnalæknir minnir fólk á að:

• Inflúensubólusetningar eru ekki lengur í boði.

• Þiggja RSV mótefni fyrir þau ungbörn sem það á við (sjá hér að ofan).

• Vera heima á meðan þú hefur einkenni og þangað til vel á batavegi og hitalaus í sólarhring.

• Sýna sérstaka varúð í nánd við viðkvæma einstaklinga ef þú ert með einkenni sýkingar.

• Lágmarka umgengni við aðra sem eru með einkenni sýkingar.

• Hylja munn og nef við hósta og hnerra.

• Þvo hendur oft og vel.

• Þrífa sameiginlega snertifleti og lofta út í sameiginlegum rýmum eins og hægt er.

• Íhuga notkun andlitsgrímu eftir aðstæðum.

Sóttvarnalæknir