Margrét Víkingsdóttir hefur verið ráðin sem verkefnastjóri rafrænna sjúkraskrárkerfa hjá HSN. Um nýtt starf er að ræða. Starfið var auglýst laust til umsóknar á vef Starfatorgs þann 14 janúar sl. og rann umsóknarfrestur út þann 31. janúar.

Margrét útskrifaðist með BA próf í viðskiptafræði frá Háskólanum á Akureyri árið 2003 með sérhæfingu í markaðsmálum. Árið 2021 lauk hún rannsóknartengdu MA prófi í viðskiptafræði frá sama skóla. Margrét starfaði í 15 ár sem upplýsingafulltrúi hjá Dalvíkurbyggð og sinnti þar m.a. vefumsjón og ritstýringu vefs Dalvíkurbyggðar, kynningar- og markaðsmálum, upplýsingatækni og rafrænni stjórnsýslu ásamt fleiri verkefnum. Margrét hefur einnig nýlega reynslu sem verkefnastjóri hjá hugbúnaðarfyrirtækinu Stefnu ehf en þar sinnti hún verkefnastýringu á m.a. vefsíðugerð, vefverslunum, smáforritagerð og ýmsum sérverkefnum og sérforritun.

Margrét hefur störf þann 1. apríl nk. og verður með aðalstarfsstöð á HSN Dalvík en starfar þvert á stofnunina. Við bjóðum Margréti velkomna til starfa.