Umhverfismat skal ávallt gert fyrir tilteknar stærri framkvæmdir. Tilkynna ber um aðrar framkvæmdir, sem tilgreindar eru í lögum, þar sem ákveðið er í hverju tilviki hvort framkvæmdin skulið háð umhverfismati.

Framkvæmdaflokkar

Í lögum um umhverfismat framkvæmda og áætlana eru tilgreindir tveir flokkar framkvæmda, A og B. Framkvæmdir í flokki A eru matsskyldar, þ.e. ávallt háðar umhverfismati. Framkvæmdir í flokki B eru tilkynningarskyldar, þ.e. fyrir þær er ákveðið í hverju tilviki hvort framkvæmd skuli háð umhverfismati.

Flokkur A

Flokkur A nær yfir stærri framkvæmdir sem eru líklegar til að hafa mikil umhverfisáhrif. Framkvæmdir í þeim flokki eru matsskyldar.

Dæmi um framkvæmdir í flokki A:

• orkuver með 10 MW uppsett rafafl eða meira

• efnistaka sem raskar 25 hektara svæði eða stærra eða efnismagn er 500.000 m³ eða meira.

Málsmeðferð framkvæmda í flokki A hefst með gerð matsáætlunar.

Flokkur B

Flokkur B tekur til framkvæmda sem liggja neðan viðmiðunarmarka í flokki A og fleiri framkvæmda sem kunna að geta haft umtalsverð umhverfisáhrif. Framkvæmdir í þeim flokki eru tilkynningarskyldar til HMS. Stofnunin tekur ákvörðun í hverju tilviki um hvort framkvæmdin skuli háð umhverfismati.

Framkvæmdir í flokki B, sem eru undir viðmiðunarmörkum sem tilgreind eru í viðauka við umhverfismatslögin eru einnig tilkynningaskyldar, ef þær eru fyrirhugaðar á verndarsvæði.

Dæmi um framkvæmdir í flokki B:

• nýræktun skóga á 200 hektara svæði eða stærra

• vatnsorkuver með uppsett rafafl upp á 200 kW eða meira (allt að 10 MW).

Málsmeðferð framkvæmda í flokki B hefst með tilkynningu til HMS.

Leiðbeiningar

• Leiðbeiningar um mat á umhverfisáhrifum framkvæmda

• Leiðbeiningar Evrópusambandsins um umhverfismat framkvæmda

• Yfirlit yfir framkvæmdir í flokkum A og B má finna í 1. viðauka laga um umhverfismat framkvæmda og áætlana.