Ef þú ert að kaupa nýja eign geturðu sótt um veðlánaflutning og flutt húsnæðislánið með þér á nýju eignina. Þannig heldurðu sömu kjörum og þarft ekki að greiða lántökukostnað.

Ef þú ert að kaupa íbúð sem er með áhvílandi láni frá HMS hefur þú möguleika á að taka yfir lánið. Þú getur einnig tekið yfir hluta sambúðaraðila við skilnað eða ef þú ert að kaupa þig inn í húsnæði sem önnur manneskja á fyrir.

Þú getur sótt um veðbandslausn að hluta ef þú vilt skipta upp eigninni sem þú hefur fengið lán fyrir hjá HMS. Þá er hluti eignarinnar leystur undan veðböndum lánsins á meðan þú heldur láninu.

Einnig þarf að sækja um samþykki fyrir sölu á greiðslumarki (mjólkurkvóti eða ærgildi) hjá HMS því að hún hefur áhrif á verðmæti fasteignar sem HMS veitti lán fyrir.

Ef þú vilt, breyta heimilisfangi á greiðsluseðli, afþakka heimsendingu greiðsluseðla, fá greiðsluseðil sendan á meðeiganda, afþakka greiðslujöfnun sem sett var á lán einstaklinga árið 2009 eða breyta fjölda gjalddaga á ári.

Ef þú ert með lán hjá HMS sem er ekki með gjalddaga 1. hvers mánaðar (til dæmis þann 15.) getur þú fært gjalddagann til 1. hvers mánaðar.

Ef þú vilt greiða húsnæðislánið þitt hraðar upp geturðu annað hvort greitt inn á höfuðstól um hver mánaðamót eða stytt lánstímann. Með styttri lánstíma hækka mánaðarlegar afborganir og eignamyndun verður hraðari.

Veðleyfi er leyfi frá HMS til að færa lán frá annarri lánastofnun fram fyrir sig í veðröðinni. Þetta getur til dæmis þurft við endurfjármögnun á áhvílandi láni eða viðbótarlántöku.