Öll svið sem samningurinn tekur til snerta Ísland ekki beint þar sem hér er ekki kjarnorka. Samningurinn inniheldur þó kröfur um lög og reglugerðir varðandi geislavarnir og kjarnöryggi sem Ísland þarf að uppfylla. Enn fremur eru kröfur um að sjálfstæð geislavarnastofnun eigi að vera til staðar og að fullnægjandi viðbúnaður tengt kjarnöryggi ásamt geislavörnum skuli vera til staðar.

Skýrsla Íslands til tíunda rýnifundarins

Þann 1. september skiluðu Geislavarnir ríkisins landsskýrslu Íslands til IAEA. Skýrslan lýsir því hvernig stjórnvöld og leyfishafar á Íslandi uppfylla ákvæði kjarnöryggissamningsins og fjallar um kjarnöryggis- og geislavarnaþætti og löggjöf varðandi kjarnöryggi á Íslandi. Nánar tiltekið er fjallað um aukinn viðbúnað á landinu vegna heimsókna kjarnorkuknúinna kafbáta. Einnig er áhersla lögð á að varpa ljósi á þær áskoranir sem Geislavarnir ríkisins stendur frammi fyrir, aðallega vegna skorts á fjármagni og mannauði og líka óvissu með húsnæðisstöðu stofnunarinnar.

Skrifstofa IAEA sér um að öll lönd sem undirritað hafa kjarnöryggissamninginn fái tækifæri til að lesa skýrslur hinna aðildarríkjanna. Hvert land fer síðan yfir úrval af skýrslum hinna og leggja fram skriflegar spurningar sem svarað er skriflega. Rýnifundurinn hefst í Vínarborg 13. apríl 2026 og þá munu Ísland og hin samningsríkin kynna landsskýrslur sínar. Einnig fer fram vinna við að koma auga á atriði sem betur mætti fara og eins það sem er til eftirbreytni og á rýnin þannig að geta nýst öllum.