Lífsbrú - miðstöð sjálfsvígsforvarna

Hlusta

Miðstöð sjálfsvígforvarna varð til árið 2023 þegar föstu fjármagni frá heilbrigðisráðuneytinu var veitt ótímabundið í sjálfsvígsforvarnir. Miðstöð sjálfsvígsforvarna er starfrækt undir merkjum embættis landlæknis og hefur henni verið gefið nafnið Lífsbrú. Markmið Lífsbrúar er að vinna að sjálfsvígsforvörnum í samræmi við samþykkta aðgerðaáætlun stjórnvalda frá 2018.

Nánari upplýsingar um Lífsbrú - miðstöð sjálfsvígsforvarna: lifsbru@landlaeknir.is

Nafnið Lífsbrú er myndlíking. Það vísar til vitundarvakningar á breiðum grunni um mikilvægi uppbyggilegs og heilbrigðs lífs, allt frá frumbernsku. Nafnið Lífsbrú leggur einnig huglæga brú yfir til þeirra sem haldnir eru sjálfsvígshugsunum eða við það að gefast upp, þannig að viðkomandi einstaklingar staldri við og sjái fyrir sér mögulega leið út úr ógöngunum.

Í kennimerkinu er notað tímalaust myndmál. Semikomman stendur fyrir það að saga einstaklings er ekki lokið, það er alltaf framhald á eftir semikommu. Brúin er tákn fyrir leið yfir erfiðleika. Saman mynda táknin sterka og vonríka ásýnd. Guli liturinn táknar ljós og von, auk þess sem hann er á heimsvísu gjarnan tengdur sjálfsvígsforvörnum meðan blái liturinn stendur fyrir traust og stöðugleika. Hugmyndin er að merkið vísi í ljós í myrkri, bjóði upp á stuðning og sýni að við erum öll saman í þessu, aldrei ein.

Nafn og kennimerki Lífsbrúar er komið frá Efli – Almannatengslum.

Markmið Lífsbrúar er að fækka sjálfsvígum á Íslandi í samræmi við áætlun stjórnvalda. Það verður gert með því að velja gagnreyndar aðferðir sem reynst hafa vel í þeim löndum sem við berum okkur saman við. Einnig að þróa og innleiða verklag, fræðsluefni og leiðbeiningar til að nota á öllum stigum forvarna, ásamt því að stuðla að vitundarvakningu og símenntun.

Markmiðum verður náð með breiðri samvinnu fagfólks, notenda, stofnana og félagasamtaka en einnig með fjáröflun til sjálfsvígsforvarna. Í því skyni hefur verið stofnaður sjóður með sama nafni.

Í aðgerðaáætluninni til að fækka sjálfsvígum eru sex kaflar, sem fela í sér 54 aðgerðir. Þær miðast að öllum stigum forvarna og snúa að eftirfarandi þáttum:

Eflingu geðheilsu og seiglu í samfélaginu.
Gæðaþjónustu á sviði geðheilbrigðis.
Takmörkun á aðgengi að hættulegum efnum, hlutum og aðstæðum.
Aðgerðum til að draga úr áhættu meðal sérstakra áhættuhópa.
Stuðningi við eftirlifendur.
Eflingu þekkingar á sviði sjálfsvíga og sjálfsvígsforvarna.

Forgangsröðun verkefna er gerð í samráði og samvinnu við fagráð embættis landlæknis um sjálfsvígsforvarnir og við stjórn Lífsbrúar - sjóð sem veitir fjármagni til einstakra verkefna. Verkefnin eru unnin af sérfræðingum embættis landlæknis eða af öðrum fagaðilum sem stjórnin velur.

Meðal forgangsverkefna Lífsbrúar - miðstöðvar sjálfsvígsforvarna eru:

Fræðsla og samræmt verklag við mat á sjálfsvígsáhættu.
Samræmt verklag eftir sjálfsvígstilraun og eftir sjálfsvíg.
Innleiðing á gagnreyndu efni fyrir elstu bekki grunnskóla.
Rannsókn á áhrifaþáttum sjálfsvíga á Íslandi.
Fræðsla um sjálfsvígsforvarnir fyrir lykilaðila.
Gerð forvarnarefnis fyrir fullorðna karlmenn.

Lífsbrú veitir árlega viðurkenningu til einstaklings og liðsheildar fyrir mikilsvert framlag til sjálfsvígsforvarna á Íslandi. Verðlaunin eru veitt fyrir að auka þekkingu á málefninu og fyrir að stuðla að bættri heilsu og líðan landsmanna.

Viðurkenningin var veitt í fyrsta sinn 1. september árið 2024. Hönnun á viðurkenningaskjali Lífsbrúar var í höndum Eflis – Almannatengsla.