Ekki þarf að sækja sérstaklega um lengri próftíma þar sem áætlaður próftími er rúmur. Prófakerfið kemur til með að mæla það hversu lengi nemendur dvelja við hvert prófatriði og eins hversu langan tíma það tekur hvern nemanda að leysa prófið. Þessar upplýsingar verða notaðar til að ákvarða lengd próftíma framvegis.

Upplestur í prófum: Stærðfræði

Eins og staðan er núna er ekki boðið upp á upplestur í stærðfræðiprófi í gegnum prófakerfið þar sem þessi lausn er enn ekki hluti af kerfinu. Kennari má lesa upp texta á prófi fyrir nemanda en ekki útskýra hugtök eða fyrirbæri sem könnuð eru á prófinu til að hafa ekki áhrif á niðurstöður nemanda.

Upplestur í prófum: Lesskilningur

Með lesskilningsprófi er verið að kanna að hvaða marki nemandi getur nýtt lestrarfærni sína til að afla sér upplýsinga úr texta en það eru einkum nemendur með umskráningarvanda sem þurfa, oftast tímabundið, að reiða sig á upplestur texta. Upplestur reynir á hlustunarskilning og þrátt fyrir að báðar skilningsleiðirnar (lesskilningur og hlustunarskilningur) grundvallist meðal annars á málskilningi nemanda (öll orð sem hann skilur) eru aðrar hugrænar kröfur til staðar sem eru ekki þær sömu. Þar sem verið er að kanna að hvaða marki nemandi getur nýtt lestrarfærni sína til að umskrá og skilja texta er upplestur, hvort heldur sem er á texta eða prófspurningum, ekki leyfður á lesskilningsprófi (sjá einnig umfjöllunina í kaflanum Nemendur með lestrarvanda) í leiðbeiningunum.

Ef nemandi truflast auðveldlega, eða hætt er við að hann trufli aðra við próftöku, getur verið gott að bjóða upp á próftöku þar sem næði er gott. Eins getur verið gott fyrir nemendur sem þurfa hvatningu og stuðning, annan en þann sem snýr að lausn prófsins, að taka prófið í litlum hópi.

Ef nemandi er ekki fær um að svara prófi sjálfur vegna líkamlegrar fötlunar má aðstoða hann við próftökuna. Ávallt þarf að gæta þess að aðstoð í prófi hafi ekki áhrif á niðurstöður prófsins.