Handbók ökuprófa
4. Próflýsingar - bókleg próf
Í þessum kafla er fjallað um þær reglur sem gilda um mismunandi prófafyrirkomulag ásamt þeim prófreglum sem gilda og viðurlög við broti á þeim.
Efni kaflans
4.2.1 Almennt
Einstaklingspróf kallast þau bóklegu próf sem próftaki tekur einn í prófstofu (sjá hér á eftir) það er að segja ekki lagt fyrir sem hóppróf.
Slíkt gæti meðal annars hentað fólki með lesblindu, kvíða, ADHD, námserfiðleika eða þeim sem glíma við aðra persónulega erfiðleika.
Próftími í einstaklingsprófi er að jafnaði sá sami og í hópprófi (45 mínútur). Prófdómara er þó heimilt að framlengja próftíma ef nauðsyn krefur.
Ef um rafrænt próf er að ræða safnar prófdómari saman símum próftaka eftir að innskráningu í próf er lokið.[
4.2.2 Einstaklingspróf
Einstaklingspróf skulu framkvæmd í samræmi við leiðbeiningar hér á eftir. Að öðru leyti eru allar venjulegar leiðbeiningar kynntar próftaka áður en próf hefst. Allir próftakar geta óskað eftir upplestri sem er í formi vefþulu.
Framkvæmd einstaklingsprófs
Prófdómari fylgist með eftir þörfum hvers og eins.
Prófdómari brýnir fyrir próftaka að spyrja um orð eða hugtök sem próftaki áttar sig ekki á eða skilur ekki alveg og að prófdómari geti eingöngu svarað því sem hann er spurður um.
Prófdómara ber að gæta fyllsta hlutleysis í lestraráherslum, ef um upplestur er að ræða, í sérstaökum tilvikum, og látbragði og gefi próftaka enga þá vísbendingu sem eykur þekkingu hans á því efni sem prófað er úr.
Í ákveðnum tilfellum getur prófdómari tekið próftaka í munnlegt próf upp úr prófhefti og séð um að krossa við á svarblað í samræmi við svör próftaka.
4.2.3 Túlkapróf
Túlkapróf skulu framkvæmd í samræmi við leiðbeiningar hér á eftir. Að öðru leyti eru allar venjulegar leiðbeiningar kynntar próftaka áður en próf hefst. Túlkapróf skulu eingöngu vera af prófi á íslensku yfir á tungumál sem ekki er til þýðing á. Í undantekningartilfellum má túlka frá enskri útgáfu.
Framkvæmd túlkaprófs
Ef um minniháttar tungumálaerfiðleika er að ræða er hægt að framkvæma prófið samkvæmt fyrirmælum fyrir einstaklingspróf.
Ef próftaki þarfnast túlks sér hann sjálfur um að útvega túlk sem Samgöngustofa samþykkir ef hann er ekki löggiltur. Ekki mega vera náin persónuleg tengsl milli túlks og próftaka.
Túlkapróf skulu hljóðrituð. Próftökumiðstöð tryggir skriflegt samþykki túlks og próftaka fyrir upptökunni.
Prófdómari útskýrir prófreglur fyrir túlkinum og sér til þess að prófreglum sé fylgt.
Prófdómari fylgist með prófi og gætir þess að túlkun sé eðlileg og að ekki séu gefnar upplýsingar um rétt svör.
Próftaki og túlkur skulu vera aðskildir þannig að þeir sjái ekki hvorn annan.
Próftaki hefur eina tölvu og prófdómari aðra í rafrænni próftöku.
Spurningar próftaka skal túlkur koma á framfæri við prófdómara sem sér um að svara í gegnum túlkinn.