Grænkerafæði (vegan mataræði) - leiðbeiningar

Grænkerafæði (vegan mataræði) byggir eingöngu á mat úr jurtaríkinu og sneytt er hjá öllum mat úr dýraríkinu (kjöt, fiskur, egg og mjólkurvörur).

Fæðuval

Almennt er auðveldara að viðhalda góðu næringarástandi ef fjölbreytni er í fæðuvali. Því fleiri matvæli og fæðuflokkar sem eru útilokuð þeim mun meira þarf að vanda fæðuval svo að maturinn, ásamt réttum bætiefnum, uppfylli þörf fyrir bæði orku og næringarefni. Til þess að fá öll þau næringarefni sem líkaminn þarfnast úr grænkerafæði ætti meðal annars að velja matvæli úr eftirtöldum fæðuflokkum á hverjum degi:

• Belgjurtir, t.d. baunir, ertur og linsur, tófú og aðrar sojavörur

• Heilkornavörur, t.d. hafra, bygg, hýðishrísgrjón, kínóa, hirsi, heilkornabrauð og heilkornapasta

• Grænmeti

• Ávexti og ber

• Hnetur og fræ

• Drykkjarvörur eins og vítamín- og steinefnabætta jurtamjólk, t.d. soja- og haframjólk. Vatn er besti svaladrykkurinn

• Jurtaolíur, t.d. repjuolíu, ólífuolíu og valhnetuolíu.

• Takmarka ætti mikið unnar vörur sem innihalda mikið af mettaðri fitu, salti og/eða sykri.