Öll ökutæki sem flutt eru til landsins þarf að forskrá hjá Samgöngustofu. Sama ferli gildir um ný og notuð ökutæki.
Hafa skal í huga áður en að ökutæki er flutt til landsins hvort ökutækið sé leyfilegt á Íslandi og hvaða skatta og gjöld þarf að greiða.
Ferlið
Sækja um forskráningu
Sækja má um forskráningu áður en ökutæki er flutt til landsins (sérstaklega mælt með því ef vafi leikur á því hvort leyfilegt sé að skrá ökutækið hérlendis) en almenna reglan er að umsókn sé skilað inn eftir að farmbréf hefur verið gefið út. Með umsókninni þarf að fylgja í frumriti:
CoC vottorð
skráningarskírteini eða titilsbréf (ef ökutækið hefur áður verið skráð í öðru landi)
farmbréf (nafn umsækjanda þarf að vera sama og á farmbréfi)
ef ökutækið er ekki með CoC: upprunavottorð, tæknivottorð, staðfestingar framleiðanda og mögulega önnur gögn
Afgreiðslutími umsókna um forskráningu sem hafa CoC vottorð er yfirleitt um 3-4 virkir dagar en biðtími getur verið lengri á álagstímum. Afgreiðsla annarra umsókna tekur að lágmarki 10 virka daga.
Þegar ökutækið hefur verið forskráð, fær umsækjandi staðfestingu á skráningu og ökutækið fær úthlutað fastanúmeri. Samgöngustofa pantar númeraplötur og sendir á skoðunarstöð. Framleiðslutími á númeraplötum eru 3 virkir dagar. Við umsókn um forskráningu er greitt fyrir skráninguna sjálfa og númeraplötur samkvæmt gjaldskrá Samgöngustofu.
Tollafgreiðsla
Þegar ökutæki hefur fengið fastanúmer, þarf að útbúa tollskýrslu og leggja inn til Tollstjóra.
Afhendingarheimild fæst þegar ökutæki hefur verið tollafgreitt og öll aðflutningsgjöld hafa verið greidd hjá Tollstjóranum í Reykjavík.
Tryggingar
Tryggja þarf ökutækið til þess að fá skammtímamerki, svo hægt sé að færa bílinn á skoðunarstöð.
Afhending á skammtímamerki
Samgöngustofa og flestar skoðunarstöðvar selja skammtímamerki (pappamerki). Þegar ökutækið hefur verið tryggt, er hægt að fá skammtímamerki til að færa ökutækið á verkstæði eða skoðunarstöð til skráningar. Skammtímamerki eru ekki afhent nema ökutæki séu tryggð. Hjá Samgöngustofu kostar skammtímamerki fyrir einn dag 1.114 krónur.
Afhending á ökutæki
Þegar afhendingarheimild hefur verið veitt og skammtímamerki hefur verið sótt, má sækja ökutækið hjá flutningsaðila og færa til skoðunarstöðvar sem ætti að hafa borist rafræn staðfesting á afhendingarheimild frá Tollstjóra.
Nýskráning á skoðunarstöð
Fara þarf með ökutækið á þá skoðunarstöð sem númeraplötur (fastanúmer) ökutækis
eru sendar til. Skoðunarstöðin nýskráir ökutækið og gerir tryggingafélaginu viðvart um nýskráninguna.
Kostnaður
Greiða þarf skatta og gjöld við nýskráningu og innflutning á ökutæki. Kostnaður er misjafn eftir verði ökutækis en hægt er að átta sig á kostnaði með því að skoða reiknivél Tollstjóra.
Hjá Samgöngustofu er greitt fyrir forskráningu. Forskráning kostar 4.872 krónur fyrir flest allar fólksbifreiðar fluttar inn frá Evrópu en 8.125 krónur fyrir ökutæki sem koma annars staðar frá, vörubifreiðar, hópbifreiðar og fleiri.
Í flestum tilfellum eru númeraplötur pantaðar samhliða forskráningu. Ein númeraplata kostar 6.616 krónur hjá Samgöngustofu.
Greiða þarf fyrir nýskráningu og skráningarskoðun og fer sá kostnaður eftir gjaldskrá þeirrar skoðunarstöðvar sem valin er.
Þjónustuaðili
Samgöngustofa