Dvalarréttur breskra ríkisborgara og aðstandenda þeirra

Breskir ríkisborgarar, sem höfðu skráðan dvalarrétt á Íslandi fyrir 1. janúar 2021, öðlast rétt til ótímabundinnar dvalar hér á landi þegar þeir hafa dvalist löglega í landinu samfellt í minnst fimm ár.

Sama rétt eiga aðstandendur breskra ríkisborgara sem höfðu dvalarrétt hér fyrir 1. janúar 2021

• ef aðstandendurnir höfðu sjálfir skráðan dvalarrétt á Íslandi fyrir 1. janúar 2021,

• ef aðstandendurnir komu til landsins eftir 1. janúar 2021 á grundvelli fjölskyldutengsla sem mynduðust fyrir þann tíma,

• sem og börn í þeirra forsjá sem fæddust eða voru ættleidd eftir 1. janúar 2021

þegar þau hafa dvalist löglega á landinu samfellt í minnst fimm ár.

Samfelld dvöl

Eftirfarandi telst ekki rof á samfelldri dvöl:

• dvöl erlendis í skemmri tíma en samtals sex mánuði á ári,

• dvöl erlendis vegna herþjónustu eða

• dvöl í eitt skipti að hámarki í eitt ár af ríkum ástæðum, svo sem vegna meðgöngu, fæðingar, alvarlegra veikinda, náms eða starfsnáms eða starfa sem viðkomandi er sendur til í öðru landi.

Réttur til ótímabundinnar dvalar fellur niður dveljist viðkomandi utan landsins lengur en í fimm ár samfellt.

Kostnaður

Ekki þarf að greiða fyrir umsókn. Þeir sem óska eftir nýju dvalarleyfiskorti þurfa þó að greiða 4.800 kr.  

Fylgigögn

Til skráningar á rétti til ótímabundinnar dvalar þarf að leggja fram umsókn um ótímabundinn dvalarrétt og ljósrit af síðum vegabréfs með persónuupplýsingum og undirskrift.