Skráning í verklegt próf á vinnuvélar

Að loknu bóklegu námi, bóklegu prófi og verklegri þjálfun á minni vinnuvélar er hægt að skrá sig í verklegt próf.

Þér er úthlutað prófdómara sem hefur samband innan þriggja virkra daga til að ákveða tímasetningu prófsins. Sýna þarf gild persónuskilríki með mynd fyrir próftöku. Í skráningunni þarftu að taka fram:

Greiðandi

Einstaklingsskráning er valin ef þú ætlar að greiða fyrir prófið og skírteinið. Einstaklingar greiða í skráningarferlinu.

Fyrirtækjaskráning er valin ef fyrirtæki greiðir fyrir prófið og skírteinið. Fyrirtæki fá sendan reikning.

Staðsetning prófs

Skrá þarf staðsetningu prófs.

Fjöldi próftaka

Hægt er að setja inn marga próftaka þegar óskað er eftir verklegum prófum fyrir hóp starfsfólks.

Réttindaflokkar

Velja þarf þá prófflokka sem þú vilt taka. Greitt er próftökugjald fyrir hvern flokk.

Leiðbeinandi

Þú þarft að skrá leiðbeinanda sem er með viðurkennd kennsluréttindi í þeim réttindaflokki sem viðkomandi hyggst taka próf í. Skrá þarf símanúmer eða tölvupóstfang leiðbeinanda, viðkomandi fær þá skilaboð um að skrá sig inn og staðfesta að verkleg þjálfun hafi farið fram.

Kranapróf

Nauðsynlegt er að vera með góða sjón, heyrn og hreyfigetu til að stjórna krana. Senda þarf læknisvottorð áður en verklegt kranapróf fer fram.

Vottorðið þarf að staðfesta eftirfarandi:

• Sjón: ≥0,8 á betra auga og ≥0.1 á verra auga (með gleraugu)

• Sjónsvið eðlilegt

• Heyrn eðlileg

• Limaburður eðlilegur og óhindraður

• Umsækjandi sé hraustur að öðru leyti og hann hafi ekki sjúkdóm, eða taki lyf eða önnur efni sem trufla dómgreind eða geta valdið skyndilegum meðvitundarmissi. Vottorð þarf að vera yngra en sex mánaða.

Í stað læknisvottorðs má framvísa skírteini um aukin ökuréttindi sem er yngra en 6 mánaða.