Sýkingavarnir innan heilbrigðisþjónustu

Sóttvarnalæknir hefur umsjón með öryggisbirgðum búnaðar s.s. lyfja og hlífðarbúnaðar til að bregðast við farsótt eða annarri vá (sbr. reglugerð um sóttvarnaráðstafanir nr. 817/2012) sem keyptar voru af íslenska ríkinu. Á hlífðarbúnaðarlagernum eru hlífðargrímur (FFP2 og FFP3) af ýmsum gerðum, hlífðargleraugu, hlífðarsloppar, hlífðarsvuntur, hlífðarsamfestingar og hanskar.

Tilgangurinn er að geta brugðist skjótt við ef skyndilega brestur á smitandi ástand í þjóðfélaginu, t.d. alvarlegur faraldur inflúensu, og verja þarf starfsfólk sem sinnir veiku fólki, gegn smiti. Sóttvarnalæknir annast úthlutanir af lagernum samkvæmt áhættumati. Óskum um búnað af lagernum er hægt að koma á framfæri í síma 510-1933 og á netfanginu svl@landlaeknir.is.

Mikilvægt er að heilbrigðisstarfsmenn þekki smitleiðir smitsjúkdóma og hvaða búnaður er nauðsynlegur til að verjast smiti. Í sumum tilfellum nægir að nota hanska og einnota plastsvuntur. Í öðrum tilfellum þegar fyrirbyggja þarf úðasmit eru þéttar hlífðargrímur nauðsynlegar. Við umönnun sjúklinga með smitsjúkdóma sem hafa alvarlegar afleiðingar s.s. ebóla og aðrar hitabeltissóttir þarf að nota hámarks viðbúnað.

• Fræðsluefni frá Sóttvarnastofnun Evrópusambandsins (ECDC) um örugga notkun hlífðarbúnaðar við umönnun fólks með smitsjúkdóma sem geta haft alvarlegar afleiðingar (er á ensku)

• Myndband frá Landspítala um varúð vegna smits með snertingu og úða á sjúkradeild

• Myndband frá Landspítala um varúð vegna smits með snertingu og dropum á sjúkradeild