Aðalskipulag er skipulagsáætlun sem nær til alls lands sveitarfélags. Þar er sett fram stefna og ákvarðanir sveitarstjórnar um framtíðarnotkun lands og fyrirkomulag byggðar. Stefna sem sett er fram í aðalskipulagi er útfærð nánar í deiliskipulagi fyrir einstök hverfi eða reiti.
Í kortavefsjá má nálgast upplýsingar um stöðu aðalskipulags á öllu landinu.
Á Skipulagsgátt má finna upplýsingar um skipulag í vinnslu.
Gerð aðalskipulags
Sveitarstjórn ber ábyrgð á gerð aðalskipulags. Skipulagsnefnd sveitarfélags annast gerð aðalskipulags í umboði sveitarstjórnar.
Í upphafi kjörtímabils skal sveitarstjórn taka afstöðu til þess hvort endurskoða skuli gildandi aðalskipulag.
Aðalskipulag tekur gildi þegar það hefur verið samþykkt af sveitarstjórn og staðfest af Skipulagsstofnun.
Kostnaður við gerð aðalskipulags greiðist til helminga af hlutaðeigandi sveitarfélagi og Skipulagssjóði. Umsókn um kostnaðarframlag úr Skipulagssjóði má nálgast á þjónustusíðum Skipulagsstofnunar.
Stafrænt aðalskipulag
Aðalskipulag er unnið með stafrænum hætti. Gerð stafræns aðalskipulags felur í sér að skipulagsgögn eru unnin með samræmdum hætti í landupplýsingakerfi. Þegar aðalskipulag er lagt fram til afgreiðslu Skipulagsstofnunar er gögnum skilað á stafrænu formi auk hefðbundinna skipulagsgagna. Aðalskipulag er sett fram í skipulagsgreinargerð og á skipulagsuppdráttum eins og áður. Nánari upplýsingar um landupplýsingar og stafrænt aðalskipulag.
Ferli aðalskipulagsgerðar
Í upphafi vinnu að aðalskipulagi tekur skipulagsnefnd sveitarfélagsins saman lýsingu fyrir aðalskipulagsverkefnið þar sem gerð er grein fyrir tildrögum skipulagsvinnunnar og hvernig fyrirhugað er að standa að skipulagsgerðinni. Í lýsingu er jafnframt gerð grein fyrir því hvernig fyrirhugað er að standa að umhverfismati skipulagstillögunnar. Lýsingin er samþykkt í sveitarstjórn.
Lýsingin er kynnt opinberlega og almenningi gefinn kostur á að koma ábendingum á framfæri við sveitarfélagið í gegnum Skipulagsgátt. Samtímis er leitað umsagnar Skipulagsstofnunar og annarra umsagnaraðila.
Skipulagsnefnd vinnur tillögu að aðalskipulagi í samræmi við lýsingu skipulagsverkefnisins og með hliðsjón af þeim ábendingum sem borist hafa frá almenningi og umsagnaraðilum á fyrri stigum.
Við gerð aðalskipulags eru umhverfisáhrif metin og niðurstöður umhverfismatsins nýttar við endanlega mótun skipulagstillögunnar. Aðalskipulagstillaga skal unnin í samráði við íbúa og aðra hagsmunaaðila
Þegar endanleg tillaga að aðalskipulagi liggur fyrir af hálfu sveitarstjórnar er hún er send Skipulagsstofnun til umsagnar.
Skipulagstillagan er síðan formlega auglýst til kynningar og almenningi gefinn kostur á að koma skriflegum athugasemdum á framfæri við sveitarstjórn í gegnum Skipulagsgátt.
Þegar frestur til athugasemda er liðinn tekur skipulagsnefnd afstöðu til athugasemda og umsagna og gengur frá endanlegu aðalskipulagi til lokasamþykktar í sveitarstjórn . Þá er samþykkt skipulag sent til Skipulagsstofnunar til staðfestingar.
Aðalskipulag tekur gildi þegar það hefur verið samþykkt af sveitarstjórn og staðfest af Skipulagsstofnun. Endanleg gögn og afgreiðslur eru birt á Skipulagsgátt.
