Kynntu fjölbreytt störf hjúkrunarfræðinga og iðjuþjálfa við SAk
21. nóvember 2023
Í síðustu viku var blásið til kynningar á störfum hjúkrunarfræðinga og iðjuþjálfa og var kynningin haldin í Háskólanum á Akureyri. Kynningin var opin hjúkrunarfræðinemum á 3ja ári ásamt iðjuþjálfunarfræðinemum.
![](https://images.ctfassets.net/8k0h54kbe6bj/2mjMH5bT4RwhEQ2onH24bX/78876a1a6faf9676550b372d360d1194/Komdu___li__me__okkur_squre.png?w=50&fm=webp&q=80)
![Komdu í lið með okkur!](https://images.ctfassets.net/8k0h54kbe6bj/2mjMH5bT4RwhEQ2onH24bX/78876a1a6faf9676550b372d360d1194/Komdu___li__me__okkur_squre.png?w=774&fm=webp&q=80)
Á kynningunni sagði Erla Salome Ólafsdóttir hjúkrunarfræðinemi frá starfsnámi sínu á SAk og þegar hún kom til starfa á lyflækningadeild síðasta sumar. Ráðningaferli Erlu var mjög vel skipulagt og hún átti fundi með langflestum deildarstjórum. Einnig fékk hún góðan stuðning frá mannauðsdeild. Ásta Guðrún Eydal, hjúkrunarfræðingur á gjörgæsludeild, sagði frá sinni vinnu á deildinni og líðan hennar fyrstu dagana í starfi. Hún hafði sérstaklega orð á því hversu vel hefði verið tekið á móti henni sem nýútskrifuðum hjúkrunarfræðingi. Að lokum tók Kristín Brynja Árnadóttir, iðjuþjálfi á Kristnesspítala, til máls og sagði frá fjölbreyttu og áhugaverðu starfi iðjuþjálfa á spítalanum þar sem fara fram endurhæfinga og öldrunarlækningar sjúkrahússins.
Um 50 áhugasamir nemendur í heilbrigðisvísindum mættu á kynninguna en henni lauk með góðri yfirferð Kristjönu Kristjánsdóttur, deildarstjóra mannauðsdeildar og mannauðsráðgjafa um fjölbreytt störf á sjúkrahúsinu, kjör hjúkrunarfræðinga og iðjuþjálfa á SAk svo og tækifærin sem standa hjúkrunarfræðingum og iðjuþjálfum til boða á Sjúkrahúsinu á Akureyri.
Kynningin er hluti af átaksverkefninu Komdu í lið með okkur!
Skoða myndböndin í herferðinni hér.
![](https://images.ctfassets.net/8k0h54kbe6bj/4oVrbbCzl7nS5I9Dhqj3ot/79c2f245a39e03d0f219404113b29c32/20231115_124348.jpg?w=50)
![Mynd frá kynningu í HA 15.11.2023](https://images.ctfassets.net/8k0h54kbe6bj/4oVrbbCzl7nS5I9Dhqj3ot/79c2f245a39e03d0f219404113b29c32/20231115_124348.jpg)