Jólakveðja frá framkvæmdastjórn
22. desember 2023
Senn líður að jólum og lokum þessa árs. Þrátt fyrir álag og oft á tíðum erfiðar aðstæður á vinnustaðnum sem og í heilbrigðiskerfinu öllu þá er gott að staldra við og hugsa til allra þeirra afreka sem við náum á degi hverjum og vera stolt af því. Það er ekki lítið. Framkvæmdastjórn er gríðarlega stolt af starfsfólki SAk, þrautseigju, metnaði og fagmennsku þeirra.
![](https://images.ctfassets.net/8k0h54kbe6bj/2hh7OlcTqDncu56QV5mJc/f69f2088856f8566e6c7859eb0c10a2c/DJI_0102_Litil_Contentful.jpg?w=50&fm=webp&q=80)
![Jólamynd af SAk 2023](https://images.ctfassets.net/8k0h54kbe6bj/2hh7OlcTqDncu56QV5mJc/f69f2088856f8566e6c7859eb0c10a2c/DJI_0102_Litil_Contentful.jpg?w=774&fm=webp&q=80)
Árið hefur verið viðburðarríkt. Mikil mannekla hefur stýrt starfseminni að stórum hluta og er það stór áskorun að tryggja næga mönnun, ekki bara á SAk, heldur á heilbrigðisstofnunum í öllum heiminum. Þetta veldur álagi á starfsfólk, þreytu, auknum veikindum og eflaust vonleysi á stundum. Starfsemin hefur aukist á langflestum sviðum sjúkrahússins hvort sem horft er til koma á bráðamóttöku, fjölda ferðamanna, aukinna koma á dag- og göngudeildir eða innlagna. Alls staðar er aukning í starfsemistölum. Einnig er aukinn fjöldi aldraðra sem þarf að vera á SAk vegna þessa að úrræði á svæðinu eru ekki nægilega mikil fyrir þennan hóp. Þetta er ekki ákjósanleg staða, hvorki fyrir þann aldraða né heilbrigðisstarfsfólk.
Það er að vísu svo í þessu dimmasta skammdegi sem samfélagið okkar þjappar sér enn betur saman og hlúir hvert að öðru. Við erum heppin hér á Sjúkrahúsinu á Akureyri að búa svo vel að eiga reynt og hjartahlýtt samstarfsfólk og saman gerum við daglega okkar besta. Við erum þess fullviss að í sameiningu munum við leysa þau verkefni og áskoranir sem bíða okkar á næsta ári því með viljann að vopni þá tekst margt. Það bætir margt að horfa full bjartsýni og með tilhlökkun til nýs árs með nýjum áskorunum.
Sjúkrahúsið á Akureyri óskar ykkur öllum gleðilegrar hátíðar og farsældar á nýju ári með hjartans þökkum fyrir samhuginn, samvinnuna og samstöðuna á árinu sem er að líða og er það einlæg ósk okkar að jólin og áramótin verði ykkur og fjölskyldum ykkar ánægjuleg.
f.h. framkvæmdastjórnar
Hildigunnur Svavarsdóttir, forstjóri
![](https://images.ctfassets.net/8k0h54kbe6bj/4DygnlyuwDjuSieWKIyyEv/b7e0808d8e37a96e2aaee81c95fb206c/PEDR9702.jpg?w=50)
![Ný framkvæmdastjórn 2023](https://images.ctfassets.net/8k0h54kbe6bj/4DygnlyuwDjuSieWKIyyEv/b7e0808d8e37a96e2aaee81c95fb206c/PEDR9702.jpg)