Heilbrigðisgagnafræðingar búa yfir mikilli sérþekkingu á lögum varðandi skjalastjórnun, persónuupplýsingum og upplýsingaöryggi, réttindum sjúklinga og starfsfólks auk alþjóðlegra gæðastaðla. Það má með sanni segja að án heilbrigðisgagnafræðinga væri hryggjastykkið tekið úr starfsemi heilbrigðiskerfisins.

„Sértækasta þekking okkar og kunnátta snýr að kóðun og flokkun sjúkdóma, einkenna og kvilla og tilheyrandi aðgerða og meðferða. Allt er þetta kóðað eftir ákveðnum alþjóðlegum stöðlum og flokkunarkerfum þar sem hver sjúkdómur, einkenni, kvilli, aðgerðir og meðferðir eiga sér eigin kóða innan flokkunarkerfisins. Þessir kóðar gera það að verkum að greiningar eru samkvæmt alþjóðlegum staðli og eru eins milli stofnana,“ segir Veronika Rut Hjartardóttir, formaður Félags heilbrigðisgagnafræðinga og starfandi heilbrigðisgagnafræðingur á myndgreiningardeild SAk.

Heilbrigðisgagnafræðingar á SAk starfa þvert á allar deildir en tilheyra þó öll Miðstöð heilbrigðisgagnafræðinga (áður læknaritaramiðstöð). Heilbrigðisgagnafræðingar voru í lykilhlutverki við innleiðingu DRG – þjónustutengd fjármögnun sem hófst í byrjun árs 2020. Samkvæmt skilgreiningu DRG þurfa skráningar, sjúkdómsgreininga og / eða meðferðir að vera skráðar m.t.t. DRG flokkunnar í sjúkraskrá. Við útskriftir af legudeildum og öllum komum á dag-, göngu- og bráðadeildir þarf framangreint að vera fyrirliggjandi og miða við læknisfræðilegt ástand sjúklings og veitta meðferð. Frá innleiðingunni hefur grettistaki verið lyft hvað varðar þessar skráningar og kóðunar. Til glöggvunar er hægt að nefna 350 ófrágengnar legur árið 2021 sem fóru niður í 24 árið 2022.

Starf heilbrigðisgagnafræðinga á sannarlega eftir að þróast mikið á næstu árum en mikilvægi þessarar stéttar innan heilbrigðiskerfisins er óumdeilanlegt. Heilbrigðisgagnafræðingar munu áfram gegna lykilhlutverki varðandi utanumhald heilbrigðisgagna, skipulag kennslu annarra heilbrigðisstétta í notkun rafrænna sjúkraskráarkerfa ásamt því að koma fleiri verkefnum tengdum gagnavinnslu og vistun í góðan farveg í framtíðinni.

Nafn: Veronika Rut Hjartardóttir

Starfsheiti: Heilbrigðisgagnafræðingur

Fæðingarár: 1990

Hvaðan ertu: Akureyri

Menntun: Kvikmyndagerð, fjölmiðlafræðingur og heilbrigðisgagnafræðingur

Hversu lengi hefurðu unnið á SAk: Næstum 3 ár

Áhugamál: Listir, samfélagsmál, góðar bækur, kvikmyndir og þættir

Hvað varstu í fyrra lífi: Planta sem lifði á sólarljósi á sumrin og lagðist í dvala á veturna

Sturluð staðreynd: Ég er með 10 cm plötu og 8 skrúfur í ökklanum eftir brot og aðgerð í Kambódíu

Hvernig lítur hefðbundinn vinnudagur út hjá þér á SAk: Útfylling eyðublaða í Sögu, vinnsla svara í RIS, vottorð, afhending á sjúkragögnum utan stofnunar í samræmi við lög, samskipti við sjúklinga / tryggingastofnanir / lögfræðistofur, tímabókanir, augnlækna, skrif dikteringa, HNE lækna, miðlun tilvísana og beiðna, umsjón biðlista hjá augnlæknum, kóðun viðeigandi eyðublaða, utanumhald viðeigandi skjala, samskipti við lækna, geislafræðinga og tilfallandi starfsfólk deilda og fleira tilfallandi.

Hvað er skemmtilegast í vinnunni: Félagsskapurinn

Hvað er mest krefjandi í vinnunni: Vinnuálagið

Ef þú mættir breyta einhverju í vinnunni, hvað væri það: Efla fræðslu til allra stétta, finna leiðir til að létta á vinnuálagi

Eitthvað að lokum? Lífsspeki? Pissaðu áður en naglalakkið fer á neglurnar.

Laus störf fyrir heilbrigðisgagnafræðinga:

• Heilbrigðisgagnafræðingur tímabundin staða

• Heilbrigðisgagnafræðingur, 100% staða