Forsetahjónin í opinbera heimsókn á SAk
29. ágúst 2023
Laugardaginn 26. ágúst komu forsetahjónin hr. Guðni Th. Jóhannesson og frú Eliza Reid í opinbera heimsókn á Sjúkrahúsið á Akureyri. Hildigunnur Svavarsdóttir, forstjóri SAk, ásamt Sigurði Einari Sigurðssyni, framkvæmdastjóra lækninga og Ragnheiði Halldórsdóttur, framkvæmdastjóra lyflækningasviðs, tóku á móti forsetahjónunum og föruneyti og kynntu starfsemi SAk.
![](https://images.ctfassets.net/8k0h54kbe6bj/4gqmFr7qSEpUvEeF2oEDSQ/882bc4911391c69a07ed37ca9127523d/DST_2757.jpg?w=50&fm=webp&q=80)
![Forsetahjón í opinberri heimsókn á SAk](https://images.ctfassets.net/8k0h54kbe6bj/4gqmFr7qSEpUvEeF2oEDSQ/882bc4911391c69a07ed37ca9127523d/DST_2757.jpg?w=774&fm=webp&q=80)
Fyrst var ferðinni heitið á rannsókn þar sem Inga Stella Pétursdóttir forstöðulífeindafræðingur sýndi þeim ferðalag blóðsýna. Þá var komið að því að heimsækja sjúklinga á blóðskilun en þar tók Sólveig Tryggvadóttir hjúkrunarfræðingur á móti hópnum. Því næst var farið á „stofugang“ á skurðlækningadeild þar sem Hilda Hólm Árnadóttir forstöðuhjúkrunarfræðingur fræddi gestina um dagleg verkefni og áskoranir vegna fjölda ferðamanna á deildinni. Forsetahjónin heilsuðu upp á sjúklinga sem margir höfðu orð á því að það að fá heimsókn frá forsetahjónum Íslands væri nú saga til næsta bæjar. Að lokum var farið niður í eldhús þar sem Hanna Fríður Stefánsdóttir matartæknir leiddi þau í gegnum starfsstöðina uns þau snæddu í matsalnum. Þar spunnust skemmtileg samtöl við starfsfólk.
„Við erum svakalega ánægð með að hafa fengið forsetahjónin loksins í opinbera heimsókn á sjúkrahúsið okkar. Sjúkrahúsið á Akureyri er stærsti vinnustaðurinn á svæðinu fyrir utan Akureyrarbæ og gríðarlega mikilvægt sem varasjúkrahús og mótvægi við Landspítalann á höfuðborgarsvæðinu. Við erum stolt af því starfsfólki sem vinnur hér gríðarlega góða og faglega vinnu og við viljum einmitt setja mannauðinn okkar í verðskuldað sviðsljós,“ segir Hildigunnur Svavarsdóttir forstjóri SAk um heimsókn forsetahjónanna.
Forsetahjónin voru mjög áhugasöm og spurðu mikið út í starfsemina. Hópurinn var svo kvaddur með gjöfum. Hildigunnur Svavarsdóttir forstjóri SAk færði forsetahjónunum bókina Sögu hjúkrunar á Íslandi á 20. öld eftir Margréti Guðmundsdóttur ásamt forlátum sokkapörum merkta sjúkrahúsinu – vitandi af sokkaáhuga forsetans.
Sjúkrahúsið á Akureyri þakkar forsetahjónunum hjartanlega fyrir komuna. Meðfylgjandi eru myndir frá Daníel Starrasyni ljósmyndara.
![](https://images.ctfassets.net/8k0h54kbe6bj/J2zJnblQqDSLud8kImH17/a6ede06c259b8c6d5da54edace30618d/DST_2740.jpg?w=50)
![Forsetahjón heimsækja SAk](https://images.ctfassets.net/8k0h54kbe6bj/J2zJnblQqDSLud8kImH17/a6ede06c259b8c6d5da54edace30618d/DST_2740.jpg)
![](https://images.ctfassets.net/8k0h54kbe6bj/6Vj8GXDvPV3k1tBvNWKdag/d5725ae0f11386544eedc396e63f2983/DST_2547.jpg?w=50)
![Forsetahjón heimsækja SAk](https://images.ctfassets.net/8k0h54kbe6bj/6Vj8GXDvPV3k1tBvNWKdag/d5725ae0f11386544eedc396e63f2983/DST_2547.jpg)
![](https://images.ctfassets.net/8k0h54kbe6bj/33CfmLGztnqKJSfPeHnI5H/8c019d39be5b50d3da237dd23a5bef7b/DST_2609.jpg?w=50)
![Forsetahjón heimsækja SAk](https://images.ctfassets.net/8k0h54kbe6bj/33CfmLGztnqKJSfPeHnI5H/8c019d39be5b50d3da237dd23a5bef7b/DST_2609.jpg)
![](https://images.ctfassets.net/8k0h54kbe6bj/561Y4yuZMiG5TsafiBcYEY/346fdcde70408133ba6cd2468f8b4a65/DST_2649.jpg?w=50)
![Forsetahjón heimsækja SAk](https://images.ctfassets.net/8k0h54kbe6bj/561Y4yuZMiG5TsafiBcYEY/346fdcde70408133ba6cd2468f8b4a65/DST_2649.jpg)
![](https://images.ctfassets.net/8k0h54kbe6bj/2RCJS1oD0bZJpZ4qjl6OA4/f4c6f04515f7c99b9772e8e3b3bdc0c4/DST_2491.jpg?w=50)
![Forsetahjón heimsækja SAk](https://images.ctfassets.net/8k0h54kbe6bj/2RCJS1oD0bZJpZ4qjl6OA4/f4c6f04515f7c99b9772e8e3b3bdc0c4/DST_2491.jpg)