Ferðastyrkir fyrir listafólk og fagfólk í menningu

Culture Moves Europe býður einstaklingum og hópum upp á styrki til að ferðast á milli Evrópulanda í þeim tilgangi að þróa listræna starfsemi sína, efla samstarf, afla sér nýrrar þekkingar og byggja upp tengslanet.

Styrkirnir eru ætlaðir listafólki og fagfólki á sviði menningar sem er 18 ára eða eldra og búsett í þátttökulöndum Creative Europe.

Einstaklingar geta sótt um styrki til ferða sem vara í 7–60 daga, en hópar með allt að fimm þátttakendum geta sótt um ferðir sem vara í 7–21 dag.

Styrkirnir fela í sér 400 evra ferðastyrk og 85 evra dagpeninga. Viðbótarstuðningur getur einnig verið í boði, meðal annars vegna sérstakra aðstæðna þátttakenda.

Umsóknarfrestur er til 30. apríl 2027, en umsóknir eru metnar mánaðarlega og því er hægt að sækja um á mismunandi tímum á umsóknartímabilinu.

Sækja um ferðastyrk

Nánari upplýsingar um ferðastyrki Culture Moves Europe

Styrkir til gestavinnustofa og listamannadvalar (resedensíur)

Einnig hefur verið opnað fyrir umsóknir um styrki til gestavinnustofa og listamannadvalar (Residency Hosts) á vegum Culture Moves Europe.

Styrkirnir eru ætlaðir menningarstofnunum og öðrum aðilum sem vilja taka á móti listafólki og fagfólki frá þátttökulöndum Creative Europe. Hægt er að sækja um að taka á móti einum til fimm þátttakendum.

Verkefnin þurfa að uppfylla að minnsta kosti tvö af fimm markmiðum áætlunarinnar: að skapa, læra, kanna, tengjast og umbreyta. Með styrkjunum er lögð áhersla á alþjóðlegt samstarf, þekkingarmiðlun og ný tækifæri til listrænnar þróunar.

Umsóknarfrestur er til 18. janúar 2027.

Nánari upplýsingar um Culture Moves Europe

Fleiri styrkir og umsóknarfrestir á næstunni

Auk Culture Moves Europe eru fleiri tækifæri í boði fyrir listafólk, menningarstofnanir og aðra aðila í skapandi greinum:

• Perform Europe 2026–2028 - Styður við nýjar og sjálfbærar leiðir til alþjóðlegs samstarfs og sýningarhalds í sviðslistum.
  Umsóknarfrestur: 22. október 2026.

• Circulation of European Literary Works - Styrkir bókaútgefendur til þýðinga, útgáfu og dreifingar evrópskra bókmenntaverka.
  Opnað fyrir umsóknir 21. október 2026.

• European Festivals Fund for Emerging Artists (EFFEA) - Styður við samstarf evrópskra listahátíða og veitir nýju og upprennandi listafólki tækifæri til að koma sér á framfæri á alþjóðavettvangi.
  Umsóknarfrestur: 3. nóvember 2026.

• ZMINA: Resilience - Styður við samstarfsverkefni evrópskra menningaraðila með áherslu á samvinnu, nýsköpun og seiglu í menningargeiranum. Nánar um ZMINA.
  Umsóknarfrestur: 4. desember 2026.

Listafólk, menningarstofnanir og aðrir áhugasamir eru hvattir til að kynna sér þessi tækifæri og kanna hvaða styrkir henta þeirra verkefnum.