Nýlega var upplýst um að samfélagsmiðillinn Facebook hefði notað verktaka til að yfirfara hljóðupptökur sem teknar voru upp í gegnum skilaboðaforrit fyrirtækisins, Messenger, í tengslum við „Voice to text“-þjónustu forritsins.

Persónuvernd hefur nú fengið þær upplýsingar frá persónuverndarstofnuninni á Írlandi (Data Protection Commission - DPC) að um sé að ræða hljóðupptökur frá um það bil 50 einstaklingum á Evrópska efnahagssvæðinu, þar af einum frá Íslandi, sem voru afritaðar handvirkt af Facebook Inc. þegar einstaklingur í Bandaríkjunum notaði umrædda þjónustu forritsins og átti í samskiptum við einstakling á Evrópska efnahagssvæðinu. Samkvæmt upplýsingum sem Persónuvernd hafa borist hefur verið slökkt á umræddum valmöguleika á meðan atvikið er til skoðunar.

Þar sem ákvörðun um vinnsluna var ekki í höndum Facebook Ireland Ltd., sem hefur staðfestu á Írlandi, heldur móðurfyrirtækisins Facebook Inc., sem staðsett er í Bandaríkjunum, er samræmingarkerfi evrópsku persónuverndarreglugerðarinnar ekki virkjað og ber því persónuverndarstofnun hvers og eins ríkis innan EES, sem öryggisbresturinn nær til, ábyrgð á að fylgja málinu eftir.

Í ljósi þeirra upplýsinga sem Persónuvernd hafa borist frá systurstofnun sinni á Írlandi hefur stofnunin ákveðið að hefja frumkvæðisathugun vegna þessa öryggisbrests hjá Facebook.