Evrópska persónuverndarráðið (EDPB) hefur gefið út yfirlýsingu um aukinn skýrleika, stuðning og þátttöku (e. Statement on enhanced clarity, support and engagement) þar sem lögð er áhersla á aukið samráð við hagsmunaaðila og aðgerðir sem auðvelda eiga aðilum að uppfylla skilyrði persónuverndarreglugerðarinnar.

Í yfirlýsingunni eru kynntar aðgerðir sem miða að því að auðvelda fylgni við persónuverndarreglugerðina, einkum fyrir ör-, lítil og meðalstór fyrirtæki, aðgerðir til að stuðla að aukinni samræmingu við beitingu reglugerðarinnar og aðgerðir til að efla samspil reglugerðarinnar við aðrar reglugerðir.

Meðal aðgerða er að útbúa, og samræma milli landa, sniðmát fyrir algeng skjöl, gátlista, leiðbeiningar og svör við algengum spurningum til að aðstoða fyrirtæki og stofnanir að uppfylla skyldur sínar samkvæmt persónuverndarreglugerðinni.

Markmið aðgerðanna er að styrkja starfsemi ör-, lítilla og meðalstórra fyrirtækja og auka nýsköpun og samkeppnishæfni í Evrópu. EDPB leggur áherslu á að hlutverk persónuverndar er mikilvægur liður í að halda uppi evrópskum gildum og grundvallarréttindum einstaklinga.

Nánari upplýsingar er að finna í fréttatilkynningu á vefsíðu EDPB.