Ábyrgðaraðilar þurfa að huga að mörgu við innleiðingu allra hugbúnaðarlausna, þar á meðal gervigreindalausna. Við innleiðingu þarf m.a. að huga að kröfum persónuverndarlöggjafarinnar um framkvæmd mats á áhrifum á persónuvernd ásamt áhættu- og öryggismati. Einnig getur t.d. þurft að uppfæra persónuverndaryfirlýsingar og huga vel að upplýsingagjöf til hins skráða.

Frekari upplýsingar um mat á áhrifum á persónuvernd og fyrirframsamráð er að finna vefsíðu Persónuverndar.

Evrópska persónuverndarráðið gaf út álit um notkun persónuupplýsinga við þróun og notkun gervigreindarlíkana í desember 2024 en þar er m.a. að finna leiðbeiningar um lögmæta hagsmuni sem vinnsluheimild og umfjöllun um hvenær gervigreindarlíkön geta talist ópersónugreinanleg.

Sem stendur er unnið að ýmiss konar breytingum á löggjöf Evrópusambandsins varðandi stafræna tækni, þar á meðal persónuverndarlöggjöfinni. Sú vinna getur haft áhrif á þær reglur sem gilda um vinnslu persónuupplýsinga við notkun gervigreindar. Persónuvernd mun greina nánar frá þessum breytingum þegar þær liggja fyrir. Nánar um þá vinnu má sjá á vef framkvæmdastjórnar Evrópusambandsins.