Framkvæmdastjórnin óskaði eftir áliti EDPB á grundvelli almennu persónuverndarreglugerðarinnar (GDPR) og löggæslutilskipunarinnar (LED) en fyrri jafngildisákvörðun rennur út í desember 2025. Framlenging gildistíma jafngildisákvörðunarinnar mun gera stofnunum og fyrirtækjum kleift að flytja áfram persónugreinanleg gögn til Bretlands á þeim grundvelli, án annarra ráðstafana.

Var það álit EDPB að sum atriði draganna kölluðu á frekari athugun, m.a. hvað varðaði valdheimildir embættismanna (nánar tiltekið Secretary of State), reglur í Bretlandi varðandi skoðun á fullnægjandi vernd í þriðju löndum og breytingar á uppbyggingu bresku persónuverndarstofnunarinnar (Information Commissioner‘s Office – ICO) og valdi stofnunarinnar, auk annars. Að auki bendir EDPB sérstaklega á opnari nálgun á sjálfvirka ákvarðanatöku og mikilvægi mannlegrar íhlutunar.

EDPB fagnar því að eftirlitskerfi með löggæsluyfirvöldum er að mestu óbreytt. Sambærilegar athugasemdir eru þó t.d. gerðar hvað varðar flutning persónuupplýsinga til þriðju ríkja sem og sjálfvirka ákvarðanatöku, og er mikilvægi mannlegrar íhlutunar áréttað. Bendir ráðið á að nauðsynlegt sé að framkvæmdastjórnin fylgist náið með beitingu nýrra valdheimilda og þeim úrræðum sem einstaklingar hafa samkvæmt breska persónuverndarregluverkinu.

Sjá nánar á vef EDPB