Lögreglan
Umfangsmikið fíkniefnamál - lagt hald á 6 kg af kókaíni
22. september 2025
Lögreglan á höfuðborgarsvæðinu, í samstarfi við tollgæsluna og lögregluna á Suðurlandi, hefur lokið rannsókn á umfangsmiklu fíkniefnamáli sem kom upp í sumar, en þá fundust tæplega 6 kg af kókaíni í bifreið sem var flutt með fragtskipi til Þorlákshafnar.
Þrír erlendir ríkisborgarar sitja enn í gæsluvarðhaldi vegna málsins, en upphaflega voru sex manns handteknir vegna þess í júlí. Við aðgerðir því tengdu var enn fremur notið aðstoðar sérsveitar ríkislögreglustjóra. Málið er nú komið í ákærumeðferð hjá embætti héraðssaksóknara.
Við minnum á upplýsingasíma lögreglu 800 5005. Í hann má hringja nafnlaust til að koma á framfæri upplýsingum um skipulagða brotastarfsemi, eða önnur brot sem fólk hefur vitneskju um.