Stjórnun og eftirlit í parasamböndum ungs fólks fer í auknum mæli fram í gegnum tækni. Það gerir slíka hegðun bæði auðveldari og ósýnilegri en áður. Nú er hægt að fylgjast með einhverjum allan sólarhringinn án þess að nokkur taki eftir því. Stjórnunin byrjar oft smátt og getur virst eðlileg í fyrstu. Því getur liðið langur tími þar til einhver áttar sig á að eitthvað er að. Samþykki og friðhelgi gilda líka í parasamböndum og mikilvægt er að vita hvert hægt er að leita í slíkum málum.

Fræðslupakkinn er byggður upp á sama hátt og fyrri pakkar. Hann inniheldur kennsluleiðbeiningar, glærur og verkefni sem kennarar geta nýtt og lagað að sínum nemendahópi. Hægt er að fara yfir efnið á 40 eða 80 mínútum. Kennarar geta valið á milli stuttra verkefna, sem taka aðeins nokkrar mínútur, og lengri verkefna, sem taka um 30 mínútur eða lengur. Lengri verkefnin fjalla um muninn á umhyggju og stjórnun, um að setja mörk, um keðju ofbeldis og um þau úrræði sem standa til boða. Í pakkanum eru einnig almennar leiðbeiningar fyrir kennara og yfirlit yfir íslensk lög sem tengjast efninu.

Ásta Berglind Proppé Steinarsdóttir, samfélagslögregla hjá lögreglunni á Suðurlandi, kynnir fræðsluna og efni hennar í myndbandi á vefsíðu pakkans. Fræðslupakkinn um stafræna stjórnun í parasamböndum fylgir í kjölfar pakka um deilingu nektarmyndefnis og kynlífskúgun, sem kom út 6. október sl., pakka um neteinelti, sem kom út 14. október sl., og pakka um gervigreind og djúpfölsun, sem kom út 26. október sl. og með honum lýkur röðinni. Allir pakkarnir eru aðgengilegir á vefnum Stopp ofbeldi! (stoppofbeldi.mms.is) hjá Miðstöð menntunar og skólaþjónustu.

Lögreglan hvetur skóla, foreldra og forsjáraðila og annað fagfólk sem starfar með börnum og ungmennum til að kynna sér efnið.

Fræðslupakkann má nálgast hér.

Börnum og ungmennum sem verða fyrir stafrænu ofbeldi, og öllum sem hafa áhyggjur af barni, er bent á að 112 aðstoðar í neyð. Hjálparsími Rauða krossins, 1717, er opinn þeim sem vilja tala við einhvern.

Vitundarvakningin er unnin af lögreglunni í samstarfi við Miðstöð menntunar og skólaþjónustu, Barna- og fjölskyldustofu, Netvís, Heimili og skóla, Kennarasamband Íslands, Neyðarlínuna, Samband íslenskra sveitarfélaga, Samskiptaráðgjafa íþrótta- og æskulýðsstarfs og Taktu skrefið. Fræðsluefnið er að hluta styrkt af Evrópusambandinu og netöryggisstyrk Eyvarar.