Markmiðið er að veita öllum þolendum kynferðisofbeldis, svo sem nauðgunar eða tilraunar til nauðgunar, skjóta og örugga þjónustu, tryggja velferð og réttindi þeirra og draga úr líkamlegum og andlegum afleiðingum ofbeldisins.
Þjónusta Neyðarmóttöku er gjaldfrjáls og veitt allan sólarhringinn
Þolendur kynferðisofbeldis fá ráðgjöf, stuðning, læknisskoðun og meðferð. Þeim sem leita til neyðarmóttöku er sýnd tillitssemi, hlýja, traust og trúnaður. Þjónustan er í boði hvort sem ákveðið er að kæra málið eða ekki.
Þjónusta og meðferð vegna kynferðisofbeldis
Tekin sýni til að greina eða útiloka sýkingar og þungun.
Mat og meðferð á áverkum eftir alvarleika þeirra.
Réttarmeinafræðiileg skoðun, ásamt töku og varðveislu sakargagna, ef á við.
Nákvæm skráning frásagnar brotaþola, andlegs ástands og áverka, andleg líðan er metin og ástand þolanda við komu er skráð.
Tekin stroksýni til DNA-rannsókna og sakargögnum safnað, eins og fatnaði og öðrum hlutum.
Ljósmyndir teknar af áverkum og varðveittar sem hluti sakargagna.
Fylgst með líkamlegum áverkum, meðferðum og mögulegri þungun.
Viðkomandi getur þurft að mæta í frekari rannsóknir og myndatökur eftir áverkum.
Endurkomur eru skráðar í endurkomuskýrslu um brotaþola.
Blóðsýnatökur
Þolendur þurfa að mæta í blóðprufu vegna mögulegra smitsjúkdóma (lifrarbólgu B+C og HIV) sem þarf að endurtaka eftir 3 og 6 mánuði.
Þessar blóðprufur eru gerðar á húð- og kynsjúkdómadeild eða heilsugæslustöð þolendum að kostnaðarlausu án þess að tiltaka þurfi ástæðu fyrir beiðni þar.
Samkvæmt lagalegri skyldu þarf neyðarmóttaka að tilkynna mál til barnaverndaryfirvalda ef ungmenni er yngri en 18 ára.
Skýrslur Neyðarmóttöku eru bara afhentar lögreglu gegn skriflegri samþykkisyfirlýsingu brotaþola, forráðamanns barns sem er yngra en 18 ára eða barnaverndar.
Hvernig á að auka líkur á að finna sakargögn
Koma eins fljótt og hægt er eftir meint kynferðisbrot
Vera í fötum sem tengjast broti eða hafðu þau meðferðis á neyðarmóttöku
Ekki fara í bað eða þvo sér fyrir skoðun og sýnatöku.
Ekki þvo eða henda fötum eða tíðarvörum sem tengjast atvikinu
Ekki fleygja verjum eða öðru sem tengjast atvikinu
Ekki hreinsa eða farga sakargögnum á sakarvettvangi eins og rúmfatnaði, húsgögnum, húsbúnaði, tækjum og tólum
Sakargögn eru geymd í eitt ár. Skýrslur frá Neyðarmóttöku eru aldrei afhentar lögreglu nema með skriflegu samþykki þolanda. Brotaþoli eða foreldra ungra þolenda ákveða hvort eigi að leggja fram kæru í málinu eða ekki.
