Unnið er að stöðlun meðferðarferla fyrir öll krabbamein sem meðhöndluð eru á Landspítala sem hluta af uppbyggingu og vottun Krabbameinsmiðstöðvar samkvæmt viðmiðum Organisation of European Cancer Institutes (OECI).

Stöðluð meðferðarferli fela í sér að skilgreina og samræma leið sjúklings frá tilvísun og greiningu til meðferðar og eftirfylgdar. Markmiðið er að tryggja samfellda, skýra og gæðamiðaða þjónustu þvert á deildir og fagstéttir.

Markmið stöðlunar

Með stöðluðum ferlum er leitast við að:

• Stytta biðtíma í greiningu, meðferð og eftirfylgd

• Auka jafnræði í þjónustu

• Skýra ábyrgð og verkaskiptingu innan þjónustunnar

• Bæta yfirsýn yfir ferli sjúklings og samfellu í meðferð

Hluti af stöðluninni er að skilgreina og fylgjast með biðtímum í ferli sjúklinga. Þar er meðal annars horft til:

• Tíma frá tilvísun til fyrstu komu

• Tíma frá fyrstu komu til greiningar

• Tíma frá greiningu til fyrstu meðferðar

Biðtímar eru nýttir sem gæðavísar til að styðja við umbætur og samræmda þjónustu.

Ávinningur fyrir sjúklinga

Stöðluð meðferðarferli geta aukið fyrirsjáanleika og öryggi í þjónustu með því að gera meðferðarferlið skýrara og samræmdara. Til lengri tíma er stefnt að því að þróa aðgengilegar upplýsingar fyrir sjúklinga um ferli, biðtíma og næstu skref í meðferð.