Staðan á Íslandi

• Greiningum á COVID-19 fjölgaði í síðustu viku. Tæpur helmingur þeirra 32 sem greindust með COVID-19 tengdist hópsýkingu sem upp kom á einni deild á Landspítala. Þá greindust 11 einstaklingar á bráðamóttökum, sem gefur til kynna að COVID-19 hafi einnig náð meiri útbreiðslu í samfélaginu.

• Greiningum á inflúensu fjölgaði einnig í síðustu viku. Af þeim 27 sem greindust með inflúensu í síðustu viku greindist tæpur helmingur á bráðamóttökum, en sjö einstaklingar tengdust hópsýkingu á Landspítala, á annarri deild en er nefnd að ofan.

• Færri greindust með aðrar öndunarfæraveirur í síðustu viku samanborið við undangengnar vikur. Enn hefur engin RS-veira greinst í vetur.

• Hlutfall jákvæðra sýna af greindum öndunarfærasýnum hefur hækkað undanfarnar tvær vikur sem styður að fjölgun tilfella sé raunveruleg.

• Einstaklingum sem lágu á Landspítala með öndunarfæraveirusýkingu fjölgaði í síðustu viku, og flestir af þeim greindust með COVID-19 eða inflúensu.

Mælaborð sóttvarnalæknis um öndunarfærasýkingar hefur verið uppfært með gögnum út viku 45 árið 2026 (2.-8. nóvember 2026).

^{Mynd 1: Fjöldi nýgreininga á öndunarfæraveirum og fjöldi einstaklinga inniliggjandi á Landspítala sem greindust með öndunarfæraveirur eftir vikum árs 2026, sjá mælaborð.}

Inflúensubólusetningar

Bólusetningar gegn inflúensu eru í fullum gangi. Þátttaka 60 ára og eldri er kominn upp í tæp 40% en markmið er að ná að minnsta kosti 70% þátttöku. Heilsugæsla höfuðborgarsvæðisins gerði átak í nefúðabólusetningum barna á aldrinum 2-4 ára í síðustu viku. Gögn um skráðar bólusetningar sýna að 3127 börn hafi þegið nefúðabólusetningu frá því bólusetningar hófust sem eru um 24% af börnum í þessum aldurshópi.

Staðan í Evrópu

Komum á heilbrigðisstofnanir vegna öndunarfæraveirusýkinga í ríkjum ESB/EES fer hægt fjölgandi, en tíðni er enn lág. COVID-19 er áfram sú öndunarfærasýking sem greinist í mestum mæli og eru flestar greiningar á sjúkrastofnunum meðal fólks 65 ára og eldra. Greiningum á inflúensu fer fjölgandi en árlegur faraldur er ekki hafinn. Líkt og með COVID-19 eru flestar greiningar inflúensu á sjúkrastofnunum meðal eldra fólks. RS veirusýking greinist vart í ríkjum ESB/EES. Sjá frekari upplýsingar á vef Sóttvarnastofnunar Evrópu.

Sóttvarnalæknir minnir fólk á að:

• Bólusetningar gegn inflúensu eru nú hafnar. Allir eldri en 60 ára, börn 6 mánaða til og með 4 ára og aðrir áhættuhópar eru hvattir til að huga að bólusetningu.

• Vera heima á meðan þú hefur einkenni öndunarfærasýkingar og þangað til vel á batavegi og hitalaus í sólarhring.

• Sýna sérstaka varúð í nánd við viðkvæma einstaklinga ef þú ert með einkenni sýkingar.

• Lágmarka umgengni við aðra sem eru með einkenni sýkingar.

• Hylja munn og nef við hósta og hnerra.

• Þvo hendur oft og vel.

• Þrífa sameiginlega snertifleti og lofta út í sameiginlegum rýmum eins og hægt er.

• Íhuga notkun andlitsgrímu eftir aðstæðum.

Sóttvarnalæknir