Staðan á Íslandi

Greiningum á inflúensu hefur fjölgað undanfarið, en eru þó enn tiltölulega fáar. Fjöldi greininga á COVID-19 hefur sveiflast nokkuð undanfarið en nú virðist sem greiningum fari fjölgandi, þó greiningar séu enn fáar. Engin ný tilfelli RS-veirusýkingar hafa greinst undanfarnar vikur. Af öðrum öndunarfæraveirum greinast nú helst rhinoveira (kvefveira) og enteroveira og fer greiningum fjölgandi. Tölurnar byggja á sýnum sem send eru til rannsóknar og sem fyrr koma flest sýnin frá sjúkrahúsum. Fjöldi einstaklinga sem liggja á Landspítala með öndunarfæraveirusýkingu hefur aukist jafnt og þétt frá því í sumar.

Einstaklingar sem eru í áhættuhópum ættu að fylgjast vel með hvenær bólusetning gegn árlegri inflúensu hefst.

Mælaborð sóttvarnalæknis um öndunarfærasýkingar hefur verið uppfært með gögnum út viku 41 árið 2026 (5.–11. október 2026).

^{Mynd 1: Fjöldi greininga á öndunarfæraveirum og fjöldi einstaklinga inniliggjandi á Landspítala með öndunarfæraveirur. Sjá mælaborð.}

Inflúensa

Greiningum á inflúensu fer áfram fjölgandi en eru enn tiltölulega fáar. Í síðustu viku (viku 41) greindust 19 með inflúensu. Tæpur helmingur þeirra sem greindust (átta einstaklingar) voru 65 ára eða eldri. Átta voru 15-64 ára og þrír voru undir 5 ára. Meirihlutinn (16 einstaklingar) greindist með inflúensutegund A(pdm09) og þrír voru með tegund A(H3). Sjö einstaklingar lágu á Landspítala með inflúensu, heldur fleiri en undanfarnar vikur. Af þeim sem lágu inni voru sex á aldrinum 65 ára og eldri og einn var á aldrinum 15–64 ára.

Nefúðabóluefni gegn inflúensu er komið til landsins og bólusetningar barna frá tveggja ára aldri eru hafnar. Hefðbundið inflúensubóluefni fyrir yngri börn og fyrir fullorðna er seint á ferð vegna framleiðslutafa sem hafa áhrif á alla Evrópu en vonir standa til að bólusetningar hefjist á næstu vikum á heilsugæslum og annarstaðar þar sem bólusetningar forgangshópa fara fram.

RS-veirusýking

Ekkert tilfelli RS-veirusýkingar greindist í viku 41. Aðeins hefur eitt tilfelli greinst frá byrjun júlí og var það barn undir 1 árs aldri sem greindist í viku 33 (10.–16. ágúst).

COVID-19

Í viku 41 greindust 11 einstaklingar með COVID-19, heldur fleiri en í vikunum á undan. Rúmur helmingur (sex einstaklingar) var 65 ára eða eldri og fimm einstaklingar voru á aldrinum 15–64 ára. Sex einstaklingar lágu á Landspítala með COVID-19, þrír 65 ára eða eldri og þrír á aldrinum 15–64 ára.

Aðrar öndunarfærasýkingar

Greiningum á öðrum öndunarfæraveirum fer áfram fjölgandi. Rhinoveira er enn ein algengasta öndunarfæraveiran sem greinist og greindust 40 einstaklingar með rhinoveiru í viku 41. Greiningum á enteroveiru hefur einnig fjölgað frá því í sumar og greindust 14 einstaklingar með enteroveriru í viku 41.

Staðan í Evrópu

Lítið er um greiningar á inflúensu í ríkjum ESB/EES, en greningar eru algengastar meðal eldra fólks (65 ára og eldra) og mest er um inflúensutegund A. Fáir greinast með RS-veirusýkingu um þessar mundir. Hlutfall jákvæðra COVID-19 greininga af fjölda sýna (e. test positivity) hefur hækkað á sjúkrastofnunum og eru þær greiningar helst meðal fólks 65 ára og eldra. Sjá frekari upplýsingar á vef Sóttvarnastofnunar Evrópu.

Sóttvarnalæknir minnir fólk á að:

• Einstaklingar í áhættuhópum ættu að fylgjast vel með hvenær bólusetningar gegn árlegri inflúensu hefjast.

• Vera heima á meðan þú hefur einkenni öndunarfærasýkingar og þangað til vel á batavegi og hitalaus í sólarhring.

• Sýna sérstaka varúð í nánd við viðkvæma einstaklinga ef þú ert með einkenni sýkingar.

• Lágmarka umgengni við aðra sem eru með einkenni sýkingar.

• Hylja munn og nef við hósta og hnerra.

• Þvo hendur oft og vel.

• Þrífa sameiginlega snertifleti og lofta út í sameiginlegum rýmum eins og hægt er.

• Íhuga notkun andlitsgrímu eftir aðstæðum.

Sóttvarnalæknir