Fastur liður í Skógardeginum mikla í Hallormsstaðaskógi er Íslandsmeistaramótið í skógarhöggi sem hefst klukkan tólf. Þar er meðal annars keppt í fellingu, afkvistun, hlutun bola og öðru sem krefst fimi með keðjusöginni. Til keppni kemur fólk sem kann að handleika keðjusögina og beita henni í alls kyns skógarvinnu. Um leið verður Náttúruskólinn með ýmsar þrautir og leiki fyrir börn.

Spennandi verður að sjá hver verður Íslandsmeistari í skógarhöggi þetta árið. Það kemur í ljós á hátíðarsamkomunni í Mörkinni sem hefst klukkan 13 og stendur til klukkan fjögur með fjölbreyttri skemmtidagskrá á sviði. Síðustu keppnisatriðin í Íslandsmeistaramótinu eru einmitt hluti af þessari dagskrá en svo má búast við tónlistaratriðum og ýmsu fleiru en einnig verða félagar úr félögum nautgripa- og sauðfjárbænda á Héraði og Fjörðum með heilgrillað naut og grillað lambakjöt í boði með meiru. Auðvitað verða steiktar lummur yfir eldi og hellt upp á ketilkaffi.

Nánar á Facebook-síðu viðburðarins, https://www.facebook.com/skogardagurinnmikli.