Miðstöð skógrannsókna á Íslandi hefur verið á Mógilsá í ríflega hálfa öld. Upphafið að því var þjóðargjöf Norðmanna árið 1961 sem gerði meðal annars kleift að byggja upp aðstöðu á Mógilsá til vísindastarfs og rannsókna í skógrækt. Eftir sameiningu eldri stofnana í Land og skóg fyrir rúmum tveimur árum kom fljótlega í ljós að sameina þyrfti starfsemi stofnunarinnar í Reykjavík á einum stað og lendingin var sú að taka á leigu húsnæði við Vínlandsleið í Grafarholti sem tekið verður í notkun á vormánuðum. Þar með verður Land og skógur ekki lengur með fasta starfsemi á Mógilsá þótt húseignirnar á staðnum og heimaland verði áfram á forræði stofnunarinnar.

Staðinn vörður um þjóðargjöfina

Þjóðargjöf Norðmanna var á sínum tíma ætlað að efla skógrækt á Íslandi og styrkja tengsl landanna tveggja. Starfandi er sérstök stjórn Þjóðargjafarinnar með fulltrúum frá Landi og skógi og sendiráði Noregs á Íslandi. Á nýafstaðinni Fagráðstefnu skógræktar var formlega undirritað samkomulag Lands og skógar við Skógræktarfélag Íslands og Skógræktarfélag Reykjavíkur um að félögin tvö tækju við aðstöðunni á Mógilsá og héldu þannig áfram á loft markmiðum þjóðargjafarinnar sem snerta skógrækt á Íslandi.

Ágúst Sigurðsson, forstöðumaður Lands og skógar, undirritaði samkomulagið fyrir hönd stofnunarinnar og sagði við það tækifæri að ráðstöfun þessari væri ætlað að „efla skógrækt á Íslandi og efla félagslega þáttinn í skógrækt“.

Félög taka höndum saman

Í samkomulaginu felst að Skógræktarfélag Reykjavíkur tekur við rekstri húsakosts og lóða á Mógilsá að stærstum hluta. Skógræktarfélag Íslands tekur aftur á móti við aðalbyggingunni á staðnum og flytur þangað skrifstofur sínar. Starfsfólk Skógræktarfélags Reykjavíkur er ekki að öllu ókunnugt aðstæðum á Mógilsá því að félagið hefur um árabil haft umsjón með útivistarsvæðunum í Esjuhlíðum. Aðstaðan sem félagið fær nú til umráða á staðnum mun gera félaginu kleift að sinna því hlutverki enn betur en áður og þjóna þannig almenningi um bæði útivistaraðstöðu og fræðslu.

Miðstöð skógræktar

Mógilsá verður eftir sem áður mikilvæg miðstöð fyrir skógrækt á Íslandi. Þar verður áfram aðstaða fyrir fólk að hittast í starfi og leik, kynna skógrækt og fræða, blanda geði og mynda tengsl innan skógargeirans og út á við. Á Mógilsá er hentug aðstaða til að halda smærri fundi og aðra viðburði, þar er trjásafn með fjölda trjátegunda, ýmsir tilraunareitir og mjög fjölbreytilegt útivistarsvæði sem tengist enn stærra útivistarsvæði um allar Esjuhlíðar.

Samningur til þriggja ára

Samkomulagið er gert til þriggja ára til að byrja með og verður endurskoðað í ljósi reynslunnar að því búnu, ávallt með markmið þjóðargjafar Norðmanna að leiðarljósi.