Hlekkur á streymi

Fagráðstefna skógræktar er haldin í samstarfi Lands og skógar, Landbúnaðarháskóla Íslands, Skógræktarfélags Íslands, Skógfræðingafélags Íslands og Bændasamtaka Íslands. Ráðstefnan er eins og heitið gefur til kynna vettvangur þekkingarmiðlunar og umræðu í skógargeiranum. Ráðstefnan hefur verið haldin frá því um aldamótin og hleypur til milli landshluta frá ári til árs. Síðast var hún haldin á Hallormsstað og þar áður á Akureyri.

Fyrirlestrar og umræður um eitt ákveðið þema mynda ávallt dagskrá fyrri dags ráðstefnunnar, sem að þessu sinni er „lífið í skóginum“ og snýr einkum að líffjölbreytni í skógum og hvernig tryggja megi fjölbreytnina, meðal annars með gæðaviðmiðum og stöðlum, rannsóknarstarfi og miðlun þekkingar. Einnig verður farið yfir niðurstöður úr rannsóknarverkefninu Skógvist II þar sem líffjölbreytni í skógum var rannsökuð.

En þemað tengist líka skógum og samhengi þeirra við líf og lífsafkomu fólks. Skoskur skógfræðingur, Olivia Murray, heldur upphafserindi ráðstefnunnar og ræðir um hvernig tillit er tekið til ólíkra þátta við skipulag nýskógræktarverkefna í Skotlandi, þar á meðal tengslanna við samfélagið á viðkomandi svæði og hvernig væntanlegur skógur kemur til með að gagnast samfélaginu, ekki aðeins efnahagslega heldur einnig félagslega, svo sem til útivistar. Einnig segir Aaron Shearer, sérfræðingur hjá Landi og skógi, frá doktorsverkefni sem hann vinnur að þar sem hann rannsakar samhengi skóga á Íslandi við samfélög fólks, nytsemi trjáa og skóga fyrir þéttbýlisbúa og fleira.

Seinni daginn eru á dagskránni fjölbreytt erindi um ýmis málefni sem tengjast skógum og skógrækt, rannsóknum, menntun, nýsköpun og tækni öllu sem lýtur að skógartengdum málefnum.

Nánar á síðu ráðstefnunnar