Gestirnir voru hér á landi í hálfan mánuð í heimsókn hjá Landbúnaðarháskóla Íslands en höfðu óskað eftir því við Land og skóg að fá verkefni til að spreyta sig á. Þriðjudaginn 27. maí fór Iðunn Hauksdóttir héraðsfulltrúi með hópinn í Hítardal þar sem hún hafði rætt við Gísla Friðjónsson, bónda á Helgastöðum um aðstoð við verkefnið. Finnbogi Leifsson, landeigandi í Hítardal, lét í té þrjátíu heyrúllur sem Gísli flutti á uppgræðslusvæðið innar í dalnum. Hann var svo til aðstoðar á traktornum þennan dag, skar á rúllurnar og setti þær í rofabörð.

Írsku nemarnir tóku sér svo heykvíslar í hönd og dreifðu betur úr rúllunum. Einnig gengu þau með fræ og áburð sem þau dreifðu þar sem erfitt er að komast að með vélar.

Í Hítardal er umfangsmikið uppgræðslusvæði í umsjón Lands og skógar. Þar hefur verið unnið að virkri uppgræðslu frá árinu 2019. Að þessu sinni var gömlu heyi dreift í rofabörð á svokölluðum Skógarhól þar sem eru gróðursælar „eyjar“ með runnum og lynggróðri en sums staðar líka skógarbotnsgróðri. Á milli eru svo mjög rofin svæði þar sem ekkert vex. Markmiðið með vinnu írsku nemanna þennan fallega dag í maí var að hlúa að nefndum gróðureyjum og stöðva frekara rof á þeim. Meðfylgjandi myndir tók Iðunn Hauksdóttir.

Land og skógur þakkar kærlega fyrir hjálpina!