Ræðupúltið smíðaði Ólafur Oddsson fyrir áratugum úr bol af sveru sitkagreni og gaf garðyrkjudeild borgarinnar. Ólafur var fræðslufulltrúi Skógræktarinnar en líka hagleiksmaður og ötull frumkvöðull skógarnáms, hélt reglulega fjölbreytt námskeið um nytjar á viði skógarins. Hann hafði forgöngu um margvísleg efni sem snertu skógarnám og skógarfræðslu og starfaði með skólafólki um allt land og á öllum skólastigum að því að efla útinám og útbúa útikennsluaðstöðu í skógum landsins. Ólafur lést í ársbyrjun 2023.

Vegna skipulagsbreytinga og plássleysis á garðyrkjudeild borgarinnar var ákveðið að gefa ræðupúltið Landi og skógi til baka til varðveislu og minningar um handverk þessa merka frumkvöðuls og baráttumanns. Hallgrímur Hallgrímsson, yfirverkstjóri borgarskóga hjá Reykjavíkurborg, afhenti gripinn ásamt Sölku Einarsdóttur starfsystur sinni. Á meðfylgjandi mynd sem Bjarki Þór Kjartansson tók standa þau við púltið góða.

Land og skógur þakkar góða gjöf og heimsókn.