Land og skógur
Ferðaklúbburinn 4x4 tekur til hendinni í Þjórsárdal
14. júlí 2025
Árleg landgræðsluferð Ferðaklúbbsins 4x4 var að þessu sinni farin að Sandárstungu í Þjórsárdal 7. júní. Klúbburinn hefur í yfir 20 ár tekið virkan þátt í landgræðslu með því að dreifa áburði og sá fræi á gróðursnauð svæði, auk þess að gróðursetja birki, fyrst á Þórsmörk og nú í Þjórsárdal.
Frábær hópur fólks á öllum aldri kom til að leggja hönd á plóg, að sögn Berglindar Guðjónsdóttur, verkefnastjóra Bonn-verkefna hjá Landi og skógi. Í upphafi hafi verið haldin stutt kynning þar sem leiðbeint var um dreifingu tilbúins áburðar og hvaða svæði væru best fallin til gróðursetningar birkis. Einnig hafi verið leiðbeint um dreifingu á hvítsmárafræi. Smáranum sé ætlað að framleiða nitur sem auðgar jarðveginn og styður þannig við vöxt birkisins. Loks var farið yfir aðferðir við gróðursetningu víðistiklinga, sem lifa ásamt birkinu í svepprótarsamlífi sem styrkir vistkerfið sem verið er að byggja upp.
Þegar borin höfðu verið á 600 kíló af áburði, gróðursettar 1.400 birkiplöntur, stungið stiklingum af loðvíði og gulvíði og hvítsmárafræi sáð sem niturgjafa til framtíðar, tók hópurinn verðskuldaða nestispásu í fallegum lundi þar nálægt. Að því loknu var farið í sund og dagurinn endaði á grilluðu lambakjöti á hinu skógi vaxna og notalega tjaldsvæði í Sandártungu í Þjórsárdal.
Berglind segir að starf Ferðaklúbbsins sé ómetanlegt þegar kemur að endurheimt gróðurlenda og sýnir vel hvernig útivistarfólk getur lagt sitt af mörkum til náttúruverndar. Um leið undirstrikar það ábyrgð á ferðalögum um landið í sátt og samlyndi við náttúruna.
Ferðaklúbburinn 4x4 er félag áhugafólks um jeppaferðir og útivist sem stofnaður var árið 1980. Klúbburinn leggur áherslu á öryggi, náttúruvernd og fræðslu. Hann stendur reglulega fyrir ferðum og viðburðum sem styðja við ábyrga ferðamennsku og sjálfbæra umgengni við íslenska náttúru.
Við hlökkum til næstu landgræðsluferða með 4x4!
Meðfylgjandi myndir tók Berglind Guðjónsdóttir.
