Þema dagsins 2025 er með öðrum orðum heilbrigður jarðvegur fyrir heilbrigðar borgir og bæi. Með því er athygli sérstaklega vakin á hlutverki jarðvegs í þéttbýli og þeim ógnum sem felast í því að loka jarðveginn af með uppbyggingu þéttbýlis. Jarðvegur í þéttbýli ýtir undir mikilvæga vistkerfisþjónustu, nýtist til ræktunar á matvælum, hann síar og hreinsar vatn, geymir í sér kolefni, temprar hitasveiflur og fóstrar fjölbreytni lífríkisins. Dagur jarðvegs 2025 er því herhvöt til forystufólks, vísindafólks, samfélags og almennings um að endurhugsa umhverfið í þéttbýlinu með hlutverk jarðvegsins í huga og vinna að því að fólk og náttúra geti þrifist saman í heilbrigðum borgum framtíðarinnar.

Jarðvegur er yfir og allt um kring í starfsemi Lands og skógar. Hvort sem við nefnum endurheimt vistkerfa, birkiskóga eða votlendis, landgræðslu og skógrækt, allt byggist þetta á því að styrkja og vernda jarðveg svo hann geti bundið kolefni, fóstrað fjölbreytt lífríki og skapað heilbrigð vistkerfi á landi til framtíðar. Á undanförnum árum hefur stofnunin aukið áherslu á rannsóknir, vöktun og fræðslu um jarðveg, meðal annars í tengslum við endurheimt birkivistkerfa, uppgræðslu rofins lands og ræktun nýrra skóga.

Í tilefni dagsins hvetur Land og skógur fólk til að staldra við og velta fyrir sér hvernig jarðvegur snertir líf okkar á ótal vegu, allt frá framleiðslu á mat og fóðri upp í aðgerðir til að verjast loftslagsbreytingum. Heilbrigður jarðvegur er ekki nokkuð sem við getum gengið að vísu. Hann er vísbending um að vel sé hlúð að landinu, það nýtt á sjálfbæran hátt og vistkerfin heilbrigð, líka í þéttbýlinu.

Vefur alþjóðlegs dags jarðvegs 2025

Mikilvægi jarðvegs í þéttbýli verður seint ofmetið. Ljósmynd: Pétur Halldórsson.