Heilbrigðisstofnun Norðurlands leggur ríka áherslu á að veita góða þjónustu og að starfsfólki líði vel í starfi. Báðir þessir þættir eru mældir reglulega með skipulögðum hætti svo hægt sé að fylgjast með þróuninni og gera úrbætur þegar þess gerist þörf.

Í síðustu viku bárust niðurstöður úr könnuninni Stofnun ársins 2025. Það er mjög ánægjulegt að niðurstöðurnar sýna að starfsánægja innan HSN heldur áfram að aukast, en heildareinkunn stofnunarinnar hækkar á milli ára. HSN er nú í 13. sæti í hópi stórra stofnana. Í könnuninni flokkast spurningar í níu meginþætti: stjórnun, starfsanda, launakjör, vinnuskilyrði, sveigjanleika vinnu, ímynd stofnunar, sjálfstæði í starfi, ánægju og stolt og jafnrétti. Af þessum níu þáttum hækkuðu sjö á milli ára sem undirstrikar jákvæða þróun í starfsumhverfi stofnunarinnar.

Á undanförnum árum hefur verið unnið markvisst að umbótum í starfsumhverfi, samskiptum og teymisvinnu. Sú vinna virðist vera að skila sér í aukinni starfsánægju sem er lykilforsenda góðrar þjónustu við notendur heilbrigðisþjónustunnar.

HSN mun áfram leggja áherslu á reglulegar mælingar, opið samtal og stöðugar umbætur með það að markmiði að efla bæði starfsánægju og gæði þjónustunnar.

Stofnun ársins er samstarfsverkefni Sameykis, Fjármála- og efnahagsráðuneytisins, Reykjavíkurborgar og annarra opinberra stofnana og vinnustaða víða um land.