Alls mættu tæplega 100 íslenskir læknanemar á kynninguna, en hátt í 200 Íslendingar stunda læknanám við skólann. „Við á Sjúkrahúsinu á Akureyri höfum góða reynslu af því að fá til okkar bæði nema og lækna, sem eru að taka sín fyrstu skref í faginu. Það var því ánægjulegt að finna að í þessari ferð var mikill áhugi meðal nemenda. Þau fengu kynningu á umsóknarferlinu um sérnámsgrunnsárið á Íslandi, uppbyggingu námsársins og fjölbreytta möguleika á starfsstöðvum. Við lögðum áherslu á að kynna það faglega umhverfi og stuðning sem stendur sérnámsgrunnslæknum til boða og sýna þá möguleika sem það getur skapað fyrir áframhaldandi sérnám,“ segir Harpa Snædal, yfirlæknir á SAk. 

HSN og SAk taka vel á móti læknanemum 

Fulltrúar Íslands funduðu með rektor læknaháskólans í Martin, Andreu Calkovska, þar sem ræddir voru möguleikar á áframhaldandi og auknu samstarfi. Þá var háskólasjúkrahúsið í Martin skoðað, en þar fá nemendur tækifæri til að kynnast fjölbreyttri og sérhæfðri heilbrigðisþjónustu, svo sem líffæraígræðslum, hjartaþræðingum og taugaskurðlækningum. 

Reynslan sýnir að langflestir íslenskir læknanemar í Slóvakíu skila sér aftur heim, en sumir ljúka þó hluta af sérnámsgrunnsári (áður kandidatsár) sínu í öðrum löndum. „HSN og SAk bjóða nemum upp á fjölbreytt verknám undir góðri handleiðslu, en með því að kynnast starfseminni og byggja upp tengsl við starfsfólk og svæðið aukast jafnframt líkurnar á að nemendur snúi aftur að námi loknu eða velji sérnám sem nýtist heilbrigðisþjónustu á landsbyggðinni,“ segir Guðrún Dóra Clarke að lokum.