Þingið var vel sótt en þar komu aðallega saman læknar, hjúkrunarfræðingar, sjúkraliðar og fleiri heilbrigðisstéttir bæði frá Sjúkrahúsinu á Akureyri og Heilbrigðisstofnun Norðurlands (HSN), en einnig víða annarsstaðar að til að miðla þekkingu og ræða reynslu sína af störfum á Norðurlandi.

Slík þing gefa heilbrigðisstarfsfólki tækifæri til að læra hvert af öðru og efla tengsl þvert á starfsstöðvar. Það er ekki síst gagnlegt þegar heilbrigðisþjónusta er veitt á mörgum stöðum og aðstæður í starfi geta verið ólíkar.

Fulltrúar HSN tóku virkan þátt í þinginu. Stefán Júlíus Aðalsteinsson, sérnámslæknir í heimilislækningum hjá HSN á Húsavík og formaður Læknafélags Akureyrar, var fundarstjóri og einn skipuleggjandi þingsins. Helga Þórsdóttir, sérnámslæknir í heimilislækningum hjá HSN á Sauðárkróki, hélt erindi um bráðavanda barna. Þá fjölluðu þeir Jón Pálmi Óskarsson, heimilis- og bráðalæknir hjá HSN á Dalvík og Akureyri og Eysteinn Heiðar Kristjánsson, verkefnastjóri sjúkraflutninga hjá HSN á Húsavík, um vaktina út á héraði, áskorunum og sigrum.