Sáttmálinn auðveldar miðlun aðgengilegra eintaka yfir landamæri og veitir þannig kost á fjölbreyttara lesefni á fleiri tungumálum. Marakess-sáttmálinn snýst fyrst og fremst um réttinn til að lesa. Bókasöfn á borð við Hljóðbókasafn Íslands gegna þar lykilhlutverki í miðlun. Samstarf við alþjóðlegu bókaveituna ABC (Accessible Books Consortium) gerir þetta kleift en þar er nú að finna yfir 1,25 milljónir aðgengilegra bóka á meira en 80 tungumálum. Þessar bækur geta viðurkenndar einingar á borð við Hljóðbókasafnið nálgast fyrir lánþega sína. Það er þó enn langt í land að bókaútgáfa heimsins sé aðgengileg lesendum með lestrarhamlanir og enn eru öflugir aðilar sem ekki deila efni sínu á veitu ABC.

Á tíu ára afmælinu er ástæða til að fagna sáttmálanum og huga að framhaldinu. Umhverfið hefur breyst mikið á áratug. Útgefendur, bókasöfn fyrir prentleturshamlaða og tæknifyrirtæki þurfa að vinna saman svo að þau sem glíma við hamlanir geti nálgast lesefni við hæfi og nýtt það eins og þeim þykir best. Áfram þarf að bjóða fjölbreytt miðlunarform og stuðning svo enginn verði skilinn eftir í stafrænni þróun. Tækifærin eru vissulega fyrir hendi.

Marín Guðrún Hrafnsdóttir, forstöðumaður Hljóðbókasafns Íslands