Að þessu sinni var Hljóðbókasafn Íslands gestgjafi og var fundurinn haldinn á Hótel Glym í Hvalfirði.

Efni fundarins var m.a. yfirferð með verkefnahópum s.s. tæknihópi, hópi sem fjallar um bækur fyrir börn og ungmenni, hópi sem vinnur við að bæta notendaviðmót og hópi sem fjallar um útgáfu án aðgreiningar. Ákveðið var að stofna tvo nýja hópa sem mun fjalla um bókakost og bókasafnskerfi annars vegar og Evrópulöggjöf um aðgengi hins vegar.

Samstarf af þessum toga er ómetanlegt fyrir lítið safn eins og Hljóðbókasafnið og hefur skilað sér á fjölmörgum sviðum í bættri þjónustu og auknu hagræði. Markmið samstarfsins er að skiptast á upplýsingum um stöðu og framþróun og vinna að ýmsum verkefnum, t.d. um tæknimál, samskipti við útgefendur, þjónustu við lánþega og gerð aðgengilegra bóka.

Söfnin hafa í sameiginlegri yfirlýsingu lýst því yfir að allir þurfi aðgang að upplýsingum og óheft tækifæri til samskipta til að lifa sjálfstæðu lífi og taka fullan þátt í samfélaginu. Þetta er kjarninn í starfseminni, að búa til lausnir fyrir lesendur með lestrarhömlun.