ISAC getur sett á stofn nefndir, svo sem ráðgjafarnefndir, til að annast tiltekna þætti faggildingarstarfseminnar í umboði sviðsins samkvæmt lögum um faggildingu. Ein þeirra er faggildingarráð sem starfar í tvö ár í senn. IASC skipar formann ráðsins en helstu hagsmunaaðilar tilnefna aðra fulltrúa í ráðinu. ISAC setur ráðinu starfsreglur sem ná meðal annars til hæfis ráðsfólks, hlutleysis og þagnarskyldu. Störf innan ráðsins eru ólaunuð.
Tilgangur Faggildingarráðs er að styðja við að ISAC uppfylli kröfur laga, reglugerða og alþjóðlegra staðla um aðkomu helstu hagsmunaaðila að faggildingarstarfseminni og að samræma skilning og túlkun á þeim kröfum sem samræmi er metið við.
Faggildingarráð gegnir einnig veigamiklu hlutverki við að auka tengsl og samráð milli hagsmunaaðila og ISAC. Það er ráðgefandi um almenna starfsemi ISAC, stefnumótun og þróun og veitir ISAC og ráðuneytinu faglega ráðgjöf um málefni faggildingar.
Faggildingarráð hefur ekki áhrif á ákvarðanir um einstakar faggildingar. Ábendingar og endurgjöf sem ráðið getur gert varðandi hlutleysi ISAC skal ISAC þó alltaf taka til meðhöndlunar.
Hlutverk Faggildingarráðs eru meðal annars að:
Veita ISAC ráðgjöf um málefni er tengjast starfsemi sviðsins beint. Hér er til dæmis átt við meginsjónarmið er tengjast tæknilegum og stjórnunarlegum þörfum og sjónarmiðum hagaðila og á hvern hátt faggilding muni nýtast þeim sem best.
Fylgjast með og fjalla um sjálfstæði og hlutleysi ISAC.
Vera stuðningur ISAC við ráðgjöf til atvinnuvegaráðuneytisins sem og til annarra ráðuneyta og stofnana um faggildingarstarfsemi í landinu.
Gera tillögur að stefnumótun um starfsemi ISAC þegar við á, með sérstöku tilliti til sjónarmiða hagaðila, meðal annars um fyrirkomulag samstarfs við erlenda faggildingaaðila um framkvæmd faggildinga á Íslandi.
Vera tengiliður milli hagaðila og faggildingarstarfseminnar í landinu, meðal annars til að tryggja gott samstarf og gegnsæi í upplýsingum með það að markmiði að byggja upp traust á faggildingarstarfsemi og að hún þjóni þörfum landsins sem best.
Fjalla um og leggja fram tillögur til ISAC um ný faggildingarsvið og veita ráðgjöf um fyrirkomulag samstarfs við hagaðila. Jafnframt getur nefndin verið til ráðgjafar varðandi þjónustuframboð innan samræmismatskerfa, þar á meðal hvort eigi að viðhalda eða leggja niður tiltekna þjónustu.
Taka þátt í kynningu á faggildingarstarfsemi. Megináhersla verður á að kynna opinberum aðilum og aðilum hins frjálsa markaðar hagkvæmni þess að nota faggildingu og á hvern hátt faggilding getur nýst svo sem við eftirlit ýmissa stjórnvalda og við kaup á þjónustu.
Veita umsögn um kröfuskjöl ISAC og um lagasetningu og reglugerðir sem tengjast faggildingu.
Leita eftir samstarfi við nefndir og ráð sem fjalla um málefni er tengst faggildingu.
