Mannanöfn

Á Íslandi eru nöfn foreldra notuð sem eftirnöfn. Nafnahefðin byggir á því að börn fái almennt nöfn foreldra sinna, ýmist föður, móður eða beggja. Ættarnöfn eru fátíð á Íslandi og aðeins leyfð með ákveðnum undantekningum.

Því eru fjölskyldumeðlimir á Íslandi oft með mismunandi eftirnöfn.

Dæmi:
Gunnar Jónsson og Anna Pétursdóttir eignast börn sem heita Sigurður og Elísabet að eiginnafni.
Eftirnöfn þeirra gætu verið:

• Sigurður Gunnarsson, Elísabet Gunnarsdóttir.

• Sigurður Önnuson, Elísabet Önnudóttir.

• Sigurður Gunnarsson Önnuson, Elísabet Gunnarsdóttir Önnudóttir.

Ekki er heimilt að hafa bandstrik eða „og“ í nafni.

Systkinin gætu jafnvel fengið ólík eftirnöfn, ef þau vilja, til dæmis:

• Elísabet Önnudóttir, Sigurður Gunnarsson Önnuson.

Endingar á íslenskum eftirnöfnum

Nýtt nafn sem byggir á nafni foreldra verður til með því að bæta endingunni -son eða -dóttir við nafn foreldris.

• Drengir fá nafn föður eða móður, með endingunni „-son“.
  Til dæmis Jón Sigurðsson ef faðirinn heitir Sigurður eða Jón Guðrúnarson ef móðirin heitir Guðrún.

• Stúlkur fá nafn föður eða móður, með endingunni „-dóttir“.
  Til dæmis Embla Sigurðardóttir ef faðirinn heitir Sigurður eða Embla Guðrúnardóttir ef móðirin heitir Guðrún.

Fleiri endingar á eftirnöfnum eru leyfðar, svo sem „-bur“. Einstaklingur sem hefur hlutlausa skráningu kyns í þjóðskrá er heimilt að nota endinguna á eftir nafni föður eða móður:

• Frost Ragnheiðarbur

• Blær Jónsbur

Einnig er þeim heimilt að bera eiginnafn foreldris í eignarfalli án endingar.
Orðið „bur“ er komið úr fornnorrænu og vísar til „afkvæmis“.

Vert að skoða:

Lög um mannanöfn
Mannanafnaskrá
Umfjöllun um mannanöfn á vef dómsmálaráðuneytisins