Skriflegt próf má ekki fara fram fyrr en tveimur mánuðum áður en próftaki fullnægir aldursskilyrði til að öðlast ökuréttindi í viðkomandi flokki.

Kennslustund (kest) er miðuð við 45 mínútur. Fyrir B-flokk gildir að próftaki þarf að hafa tekið 22 kest. í ökuskóla ásamt námi í ökugerði. Ef námi í ökugerði er ekki lokið þá 24 kest. í ökuskóla. Próftaki þarf ennfremur að hafa lokið 12 verklegum kest. hjá ökukennara ásamt námi í ökugerði. Ef námi í ökugerði er ekki lokið þá 14 verklegir ökutímar hjá ökukennara.

Verklegt próf má fara fram allt að tveimur vikum áður en umsækjandi fullnægir aldursskilyrðum til að öðlast ökuréttindi í viðkomandi flokki.

Umsækjandi skal hafa staðist verklegt próf áður en sex mánuðir eru liðnir frá því hann stóðst bóklegt próf. Bóklegt próf úr grunnnámi (skólapróf), ÖR-próf og próf í ferðafræði (FF) og stórum ökutækjum (SÖ) heldur þó gildi sínu í 12 mánuði. Auk þess verður aksturskennslu að vera lokið og í samræmi við námskrár. Fullnægjandi vottun ökukennara, ökuskóla og ökugerða (eftir því sem við á) verður að koma fram í ökunámsbók og upplýsingar um verklega ökutíma verða að koma fram með fullnægjandi hætti. Fari verklegt próf í D1a-, DE eða D-flokki fram utan Reykjavíkur eða Akureyrar skulu a.m.k. tveir ökutímar hafa farið fram á þessum stöðum.

Ef próftaki hefur ekki vottun um tilskilið nám skal undanþága frá Samgöngustofu fylgja og skal hún heftuð við afrifublað ökunámsbókar/ökunámsbók til Samgöngustofu eða vera skráð með rafrænum hætti í stafræna ökunámsbók.

Fyrir próf í C-, C1-, D- og D1-flokki og til farþegaflutninga á fólksbifreið (B-flokki) í atvinnuskyni skal próftaki sýna fullnaðarskírteini fyrir B-flokk nema þegar próf eru vegna endurveitingar ökuskírteinis.

Fyrir próf í BE-, CE-, C1E-, DE- og D1E-flokki skal próftaki eftir því sem við á sýna fullnaðarskírteini fyrir B-flokk eða ökuskírteini fyrir C-, C1-, D- eða D1-flokk.

Ein kennslustund = 45 mínútur

Staðið ÖR-próf má ekki vera eldra en 12 mánaða þegar umsækjandi gengst undir verklegt próf til viðbótarréttinda aukinna ökuréttinda. Þetta á ekki við um eftirvagnaréttindi.

Sérstakt verklegt próf og próf í aksturshæfni má fara fram að beiðni sýslumanns án skriflegs prófs eða munnlegs hluta verklegs prófs. Þá gildir ekki krafan um að umsækjandi hafi fullnaðarskírteini fyrir B-flokk.

Varðandi aukin ökuréttindi: Sá sem hefur eingöngu Ba-réttindi og þarf að taka B-plús próf tekur skriflegt próf fyrir B-flokk og verklegt Ba próf. Sá sem hefur auk Ba-réttinda réttindi fyrir C- og/eða D-flokk tekur verklegt próf fyrir B-flokk auk verklegra prófa fyrir viðkomandi flokka (ekki leigubíl).

Ökutæki sem notað er við verklegt próf má vera beinskipt eða sjálfskipt eftir vali próftaka. Við staðið próf skal prófdómari tilgreina með áritun á umsóknareyðublað hvort ökutækið hafi verið beinskipt eða sjálfskipt.

Takmörkun við sjálfskiptingu er ekki sett í ökuskírteini ef sjálfskipt ökutæki er notað við verklegt próf í

1. BE-, C1E-, CE-, D1E- og DE-flokki, við próf til farþegaflutninga í atvinnuskyni fyrir B-, D1- og D-flokk og til vöruflutninga í atvinnuskyni fyrir C1- og C-flokk enda hafi umsækjandi ökuskírteini fyrir þá flokka sem fengið er á grundvelli ökuprófs þar sem próf í aksturshæfni hefur verið tekið á ökutæki með beinskiptingu.

2. C-,C1-,D- og D1-flokki enda hafi umsækjandi ökuskírteini sem fengið er á grundvelli ökuprófs þar sem próf í aksturshæfni hefur verið tekið á ökutæki með beinskiptingu í a.m.k. einum af eftirtöldum flokkum: B-, BE-, C-, CE-, C1-, C1E-, D-, DE-, D1- eða D1E-flokki.

Við skipti á erlendu ökuskírteini og endurveitingu ökuskírteinis eftir sviptingu skal próf fara fram á beinskipt ökutæki nema gefa eigi út skilyrt skírteini (sjálfskipting).

Ökutæki sem notað er í prófi þarf að vera tryggt og skráð til ökukennslu nema létt bifhjól, dráttarvél og sérútbúið ökutæki fólks með fötlun. Ökutæki þarf að vera með gilda skoðun án endurskoðunar, þrifalegt, í lagi og tilbúið til aksturs. Skoðunarvottorð og skráningarskírteini skal geymt á aðgengilegum stað í ökutæki. Allar merkingar á ökutæki sem gefa til kynna að um kennsluökutæki sé að ræða verður að fjarlægja/hylja áður en próf fer fram.

Ökutæki þarf að uppfylla ákveðnar lágmarkskröfur varðandi stærð, afl og búnað til að próftaki geti sýnt að hann ráði við venjulegar umferðaraðstæður af fyllsta öryggi. Ökutæki skal tilheyra þeim flokki ökuréttinda sem prófað er til.

Bifreið, sem sérstaklega er búin fyrir hreyfihamlaðan ökumann, má próftaki nota við verklegt próf að fengnu samþykki Samgöngustofu.

Um hemla og spegla gildir hið sama og fyrir B-flokk. Ef bifreiðin er með handstýrðum hemlabúnaði til að nota með hægri hendi fellur brott áskilnaður um hemlafetil við sæti ökukennara ef einnig er unnt án erfiðleika að nota handstýrða hemlabúnaðinn úr sæti ökukennarans.

Ef prófdómari telur vafa leika á að próftaki fullnægi skilyrðum til að taka próf skal prófi frestað þar til málið hefur verið kannað. Hér getur verið um að ræða frávik í líkamlegu eða andlegu heilbrigði, grunsemdir um að próftaki sé undir áhrifum áfengis-, ávana- eða fíkniefna o.s.frv. Prófdómari skal skriflega gera grein fyrir þessum atriðum til yfirmanns og/eða sýslumanns. Athugasemdum prófdómara má koma á framfæri við sýslumann í ramma í neðra vinstra horni 2. blaðsíðu umsóknar um ökuskírteini og á sérstöku eyðublaði, Athugasemdir vegna framkvæmdar prófa, og skila því til ábyrgðarmanns ökuprófa.

Ökukennara er ekki heimilt að vera viðstaddur skrifleg eða verkleg próf eða að koma fram sem aðstoðarmaður við framkvæmd prófa nema með samþykki forsvarsmanns ökuprófa. Honum er þó heimilt að taka þátt í framkvæmd á verklegu prófi í AM-, A1-, A2- og A-flokki samkvæmt próflýsingu.

Hér sjást efnislegar breytingar sem orðið hafa á texta skjalsins og dagsetning þeirra. Breytinga er ekki getið nema þær hafi efnisleg áhrif (ekki er getið smávægilegra breytinga á orðalagi, leiðréttinga eða breytinga á uppsetningu skjalsins)