Geðrækt - ráðleggingar embættis landlæknis

Ræktum tengsl við fjölskyldu, vini, samstarfsfólk og nágranna og gefum okkur tíma til að hlúa að þeim. Jákvæð sambönd við aðra eru mikilvægasti þáttur hamingju og vellíðanar.

Hvern langar þig helst að rækta sambandið við? Hvernig væri að hafa samband við viðkomandi og stinga upp á einhverju sem þið gætuð gert saman?

Við getum gert svo margt, eins og að fara út í gönguferðir, sund, dansa heima í stofu, gera teygjuæfingar eða stunda jóga. Hreyfing færir okkur vellíðan en það mikilvægasta er að finna hreyfingu sem við höfum gaman af og hentar líkamlegu ástandi okkar og getu.

Hvaða hreyfingu gætir þú helst haft gaman af? Hvernig getur þú fléttað hreyfingu betur inn í daglegt líf þitt?

Höldum í forvitnina og tökum eftir hinu óvenjulega. Verum í núinu. Tökum eftir veröldinni í kringum okkur og hvernig okkur líður. Að veita því sem við upplifum athygli hjálpar okkur að meta það sem skiptir okkur máli.

Núvitund er ein leið til að taka betur eftir en þú getur til dæmis fundið núvitundaræfingar í ókeypis smáforritum eins og HappApp og Sterkari út í lífið.

Prófum eitthvað nýtt. Rifjum upp gamalt áhugamál. Setjum okkur markmið sem við munum hafa gaman af að ná. Það er skemmtilegt að læra nýja hluti og hefur jákvæð áhrif á sjálfsmyndina.

Er eitthvað sem þig langar að læra eða efla færni þína í? Það gæti verið hvað sem er eins og matreiðsla, teikning, leirlist, nýtt tungumál, hannyrðir eða hvað sem er. Hvernig gætir þú aukið færni eða aflað þér frekari þekkingar?

Gerum eitthvað fallegt fyrir vin eða ókunnuga manneskju. Sýnum þakklæti. Brosum. Gefum öðrum af tíma okkar. Að líta á okkur sjálf sem hluta af stærra samhengi veitir lífsfyllingu og eflir tengsl við aðra.

Hvað með að gera nokkur góðverk í dag? Þau þurfa ekki að vera stór eða taka langan tíma. Til dæmis að hrósa einhverjum, bjóða fram aðstoð, hafa samband við vin eða vandamann og athuga hvernig viðkomandi hefur það, gefa litla gjöf og svo framvegis. Að gera góðverk og hjálpa öðrum getur fært okkur tilfinningu um tilgang og aukið andlega vellíðan.

Árið 2008 fól vinnuhópur á vegum bresku ríkisstjórnarinnar, Foresight‘s Mental Capital and Wellbeing Project, samtökunum New Economic Foundation að fara yfir rannsóknir á áhrifaþáttum vellíðanar og finna gagnreyndar aðferðir til að auka vellíðan og lífshamingju. Samtökin fóru yfir rannsóknir ríflega 400 rannsakenda víða um heim og tóku saman þær aðferðir sem höfðu sterkastan rannsóknargrunn að baki. Fimm leiðir að vellíðan, eða „Five Ways to Wellbeing“, eru afrakstur þeirrar vinnu.