Alþjóðlegt ökuskírteini

Alþjóðlegt ökuskírteini er lítil bók með þýðingu á íslenska ökuskírteininu.

Íslensk ökuskírteini eru samevrópsk og eiga að gilda í öllum Evrópulöndum. Ef ferðast er til fjarlægari landa utan EES borgar sig að hafa alþjóðlegt ökuskírteini meðferðis.

Skilyrði

Skilyrði fyrir því að fá alþjóðlegt ökuskírteini eru:

• að hafa gilt íslenskt ökuskírteini

• að vera 18 ára eða eldri

Ferlið

Sýslumenn um allt land og FÍB gefa út alþjóðleg ökuskírteini. Umsækjandi þarf að koma sjálfur á staðinn.
Koma þarf með íslenska ökuskírteinið meðferðis og passamynd.
Hjá sýslumönnum er alþjóðlega ökuskírteinið afgreitt á allt að einum virkum degi.

Í undantekningartilvikum geta sýslumenn á landsvísu afgreitt alþjóðlegt ökuskírteini fyrir þá sem ekki eiga kost á að nálgast það sjálfir, t.d. vegna dvalar erlendis. Umsækjandi þarf að senda mynd af báðum hliðum ökuskírteinis síns, ásamt að útvega passamynd 35x45 mm á ljósmyndapappír og millfæra greiðslu og senda staðfestingu þess efnis.
Hjá sýslumönnum er alþjóðlega ökuskírteinið afgreitt á allt að einum virkum degi.

Skilyrði fyrir myndir í ökuskírteini

• vera á ljósmyndapappír

• stærð 3,5 x 4,5 cm

• ljós einlitur bakgrunnur

• líkjast umsækjanda vel

• tekin beint fram og sýnir höfuð (án höfuðfats) og herðar

• þar sem mynd af höfði er 30 - 36 mm á hæð

Sýslumenn taka ekki myndir í ökuskírteini og ekki er hægt að nota mynd úr vegabréfakerfi.

Kostnaður

Skírteinið kostar 1.200 kr.

Gildistími og -svið

Alþjóðlegt ökuskírteini gildir í ár frá útgáfudegi.
Athugaðu að það gildir bara fyrir þau ökutæki sem þú hefur rétt til að stjórna samkvæmt íslenska ökuskírteininu.