Tilkynning um eigendaskipti ökutækis úr dánarbúi

Þegar skráður eigandi ökutækis er látinn er hægt að skrá ökutækið á maka, erfingja eða annan aðila. Hvaða gögn þarf að leggja fram fer eftir því hver á að verða nýr eigandi.

Skráning yfir á maka

Eftirlifandi maki getur fengið ökutæki skráð á sitt nafn ef hann hefur leyfi til setu í óskiptu búi.

Skila þarf til Samgöngustofu:

• yfirlýsingu sýslumanns sem staðfestir heimildina. Yfirlýsinguna má senda í tölvupósti á samgongustofa@samgongustofa.is.

Hægt er að skrá ökutæki á maka þótt opinber gjöld hvíli á því.

Skráning yfir á erfingja

Erfingjar geta fengið ökutæki skráð á sitt nafn ef þeir hafa heimild til að ráðstafa eignum dánarbúsins.

Skila þarf til Samgöngustofu:

• yfirlýsingu sýslumanns um hverjir erfingjar eru og að þeir hafi heimild til að ráðstafa eignum dánarbúsins.

• ef skrá á ökutæki á einn af mörgum erfingjum þarf einnig að skila tilkynningu um eigendaskipti í frumriti og greiða þarf fyrir tilkynninguna. Hún skal vera undirrituð af öllum erfingjum nema umboð hafi verið veitt fyrir þeirra hönd.

Öll opinber gjöld sem hvíla á ökutækinu þurfa að vera greidd áður en það er skráð á erfingja.

Sala á ökutæki úr dánarbúi

Ef skrá á ökutækið beint á annan aðila en maka eða erfingja þarf að skila til Samgöngustofu:

• yfirlýsingu sýslumanns um hverjir erfingjar eru og að þeir hafi heimild til að ráðstafa eignum dánarbúsins

• eigendaskiptatilkynningu í frumriti og greiða þarf fyrir tilkynninguna.

Tilkynningin þarf að vera undirrituð af öllum erfingjum nema umboð hafi verið veitt til undirritunar fyrir þeirra hönd.

Öll opinber gjöld sem hvíla á ökutækinu þurfa að vera greidd áður en eigendaskiptin eru skráð.

Kostnaður

• Ekki þarf að greiða fyrir eigendaskipti þegar ökutæki er skráð af hinum látna yfir á maka eða á alla erfingja.

• Ef ekki á að skrá ökutækið á alla erfingja þess skal greiða fyrir skráningu eigendaskipta, 3.041 króna.

• Ef ökutæki er skráð beint yfir á annan en maka eða erfingja skal framvísa eigendaskiptatilkynningu og greiða fyrir skráningu eigendaskipta, 3.041 króna.