Stafrænt Ísland
Um Stafrænt Ísland
Markmið og hlutverk
Stefna um stafræna þjónustu hins opinbera var gefin út í júlí 2021.
Ísland er meðal allra fremstu þjóða heims á sviði stafrænnar þjónustu. Stafræn þjónusta er notuð til þess að skapa öflugt samfélag með aukinni samkeppnishæfni sem leiðir til verðmætasköpunar og myndar grundvöll hagsældar.
Stafræn þjónusta er skýr, örugg, einföld og hraðvirk. Upplifun notenda af þjónustunni stenst samanburð við þjónustu eins og hún gerist best. Almenningur og fyrirtæki í landinu komast beint að efninu, hvar og hvenær sem er, sem sparar dýrmætan tíma fólks. Jafnframt minnka áhrif þjónustunnar á náttúruauðlindir.
Lesa um stefnur hins opinbera í stafrænni þróun og tæknimálum.
Verkefnastofa um stafrænt Ísland var sett formlega á laggirnar árið 2018 og ætlað að aðstoða opinberar stofnanir við að bæta stafræna þjónustu við almenning með því að gera þjónustuna skýrari, einfaldari og hraðvirkari.
Markmiðið var að einstaklingar og fyrirtæki gætu leyst úr sínum málum með sjálfsafgreiðslu, auka skilvirkni og hagkvæmni, flytja gögn með öruggum hætti á milli stofnana, koma í veg fyrir tvíverknað og spara almenningi tíma og fyrirhöfn sem annars færu í ferðir til og frá stofnunum. Stafræn þjónusta sem fylgdi stjórnsýslunni yrði aðgengileg á einum stað hjá Ísland.is.
Í stuttu máli er hlutverk Stafræns Íslands að:
1. Styðja við stofnanir á stafrænni vegferð
Styðja við stofnanir á stafrænni vegferð með ráðgjöf og innleiðingu kjarnaþjónusta Stafræns Íslands.
2. Þróa og reka stafræna innviði hins opinbera
Áframhaldandi þróun og rekstur á kjarnaþjónustum.
3. Einfalda líf fólks með því að setja notandann í forgang
Fræðsluhlutverk þannig að almenningur treysti og þori að nota þær þjónustur sem verða stafrænar. Skilji eigin ávinning.
Við einföldum líf fólks
Stafrænt Ísland umbreytir þjónustu við almenning með áherslu á aðgengilegar og notendavænar stafrænar lausnir sem einfalda líf fólks og auka traust á hið opinbera.
Staðlaðir, öruggir og leiðandi tækniinnviðir
Stafrænt Ísland leggur áherslu á samræmda og staðlaða tækniinnviði, ásamt því að stuðla að öryggi, sveigjanleika og rekstrarsamfellu. Kjarnavörur Stafræns Íslands eru leiðandi í tækniþróun á Íslandi og eru þróaðar sem opinn hugbúnaður.
Hagkvæmari starfsemi hins opinbera
Stafrænt Ísland stuðlar að virðisauka og hagkvæmni hins opinbera með uppbyggingu og innleiðingu sjálfvirkra ferla, samnýtingu lausna og sjálfbærni stofnanna ríkisins í stafrænni vegferð. Ávinningur er mældur með markvissum hætti
Hagnýting gagna
Stafrænt Ísland mótar uppbyggingu gagnainnviða, samræmdra tæknilegra viðmiða og stjórnskipan í rekstri gagna hins opinbera. Markmiðið er að hagnýta gögn hins opinbera með sem bestum hætti og nýta þau til að ná fram hagræði og auka virði þjónustu.
Öflugt starfsfólk og góður rekstur
Hjá Stafrænu Íslandi starfar öflugt og hæft starfsfólk og starfsandinn er góður. Haldið er vel utanum rekstur verkefnastofunnar, markmið mælanleg, góð yfirsýn yfir fjármál og verkefni
Smelltu hér til að lesa um sögu Stafræns Íslands.