Fara beint í efnið
Stafrænt Ísland Forsíða

Stafrænt Ísland

Opin ráðstefna um stafræna framtíð hins opinbera

11. september 2020

Ráðstefna um stafræna framtíðarsýn hins opinbera og nýjungar sem unnið er að til að stórefla stafræna þjónustu verða kynntar á ráðstefnu Stafræns Íslands „Tengjum ríkið“ fimmtudaginn 24. september næstkomandi.

Tengjum ríkið

Meðal þess sem fjallað verður um er nýr og endurbættur vefur Ísland.is, upplýsinga- og þjónustuveitu opinberra aðila á Íslandi, þar sem hægt er að nálgast margvíslega þjónustu í einni gátt.

Á ráðstefnunni verður nýr vefur Ísland.is, sem senn verður aðgengilegur, kynntur en í honum felast fjölmörg tækifæri fyrir opinberar stofnanir til að bæta þjónustu sína.

Þar munu samstarfsaðilar Stafræns Íslands í stofnunum og ráðuneytum fara yfir reynsluna af þeim verkefnum sem eru í vinnslu og þeim sem þegar er lokið. Þá munu hugbúnaðarfyrirtæki sem eru í samstarfi við Stafrænt Ísland fjalla um öryggismál, rekstrarumhverfi, hönnunarkerfi og gagnamál.

Bjarni Benediktsson, fjármála- og efnahagsráðherra, opnar ráðstefnuna og Andri Heiðar, framkvæmdastjóri Stafræns Íslands, fer yfir framtíðarsýn Stafræns Íslands.

Helsti fyrirlesari ráðstefnunnar er David Eaves frá Harvard-háskóla í Bandaríkjunum. Hann sérhæfir sig í stafrænni vegferð ríkja og hyggst fjalla um sóknarfærin á Íslandi í erindi sínu Digital Transformation – Global Trends and Iceland’s Potential.

Að auki verða á ráðstefnunni um 15 örfyrirlestrar frá stofnunum og öðrum samstarfsaðilum.

Skráning á ráðstefnuna er í fullum gangi en sökum stöðu líðandi stundar verða örfá sæti í boði í sal. Ráðstefnunni verður einnig streymt beint. Mikilvægt er að þátttakendur skrái sig hafi þeir hug á að tryggja sæti í sal eða fá upplýsingar um streymi ráðstefnunnar þegar nær dregur. Forskráning gildir sem full skráning og mun tryggja sæti, upplýsingar og
aðgengi að ráðstefnunni.

Ráðstefnan fer fram í Hörpu 24. september frá kl. 13–17.
Skráning á ráðstefnuna fer fram hér.